މައްސޫދު ހިލްމީ އަދި މިއުސަމް އައްބާސް

ރާއްޖޭގެ ވެރިކަމަށް ކުރިމަތި ލުމަށްޓަކައި މޯލްޑިވިއަން ޑިމޮކުރެޓިކް ޕާޓީ (އެމްޑީޕީ) ޗެއަރޕާޝަން ކަމުން މުހައްމަދު ނަޝީދު (އަންނި) އިސްތިއުފާ ދިނުމަކީ އެޕާޓީ ދާނެ ވަކި މިސްރާބެއް ނެތި ރަށްމެދަށް ދޫކޮށްލި ދޫކޮށްލުމެއް ކަމަށް އެޕާޓީގެ ގައުމީ މަޖިލިސް ބައެއް މެމްބަރުން ސިފަކުރައްވައިފި އެވެ.

އެމްޑީޕީގެ ގައުމީ މަޖުލިސްގެ މެމްބަރު ޝުއައިބު އަލީ (ފުރަހަނި) ވިދާޅުވީ އެމްޑީޕީގެ ޗެއަރޕާސަން މުހައްޝމަދު ނަޝީދު (އަންނި) ޕާޓީގެ ޗެއަރމަން ކަމުގެ މަގާމުން އިސްތިއުފާ ދިނުމަކީ ޑިމޮކްރަސީގެ ރީތި އުސޫލެއް ކަމަށާއި އެހެން ނަމަވެސް ޗެއަރަޕާސަން ކަމުން އިސްތިއުފާ ދެއްވިއިރު ޕާޓީގެ އިދާރީ ހިންގުން އިތުރަށް ކުރިއަށް ގެންދެވޭނެ ގޮތެއް ނެތް ކަމަށެވެ.

” އަންނި ރާއްޖޭގެ ރައީސް ކަމަށް އައުމުގެ ޝައުގު ހުރި ބޮޑުކަމުން ޕާޓީ ދޫކޮށްފައި ދުއްވައިގަތީ ރަށްމެދަށް ޕާޓީ އެއްލާލައި. އެއަށްވުރެ ރީތި އުސޫލަކުން އިދާރީ ގޮތުން މިކަން ކުރެވެން އެބައޮތް“ ޝުއައިބު ވިދާޅުވި އެވެ.

އެޕާޓީގެ ގައުމީ މަޖުލިސް މެމްބަރ އުބަދުﷲ މުއާޒު ވިދާޅުވީ މިހާރުގެ އަސާސީ ގަވާއިދުގެ ދަށުން މުޅި ޕާޓީގެ ހިންގުން ބިނާވެގެން ވަނީ ޗެއަރޕާސަން މައްޗަށް ކަމަށާއި މިފަދަ ދަނޑިވަޅެއްގައި ބޭފުޅަކު އަންޔަން ކުރުމެއްނެތި ޗެއަރޕާސަންކަމުން އިސްތިއުފާ ދިނުމަކީ ޕާޓީގެ ހަރަކާތްތައް ހިންގުން ހުއްޓުވާލެއްވުމަށް ކުރެއްވި ކަމެއް ކަމަށެވެ.

ޖަޒީރާއަށް މައުލޫމާތު ދެމުން ގައުމީ މަޖިލީހުގެ ބައެއް މެމްބަރުން ވިދާޅުވީ މިފަދަ ދަނޑިވަޅެއްގައި ގައުމީ ޗެއަރޕާޝަންގެ މަގާމުން އަންނި އިސްތިއުފާ ދިނުމަކީ އެތައްހާސް ރައްޔިތުންގެ މައްޗަށް އެކުލެވޭ ސިޔާސީ ޕާޓީއަކަށް އަންނި ދީފައިވާ ވަރަށް ބޮޑު ނިކަމެތި ކަމެއް ކަމަށެވެ.

އަންނި އިސްތިއުފާ ދެއްވުމާއި ބެހޭ ގޮތުން ވާހަކަ ދައްކަމުން އެމްޑީޕީގެ ގައުމީ މަޖިލީސް މަމްބަރ ހުސެއިން ރަޝީދު ވިދާޅުވީ މިފަދަ ދަޑިވަޅެއްގައި ގައުމީ ޗެއަރޕާސަން ކަމުން އަންނި އިސްތިއުފާ ދެއްވުމުން ޕާޓީއަށް އައިސްގެންދާނެ ހީނަރުކަމަކާ މެދު ކަންބޮޑުވާ ކަމަށެވެ.

ހުސެއިން ވިދާޅުވީ އެމީހަކު އަދާ ކުރަމުން ދާ ވާޒީފާއަކާ ތައާރު ވާނަމަ އިސްތިއުފާ ދިނުން އެއީ މައްސަލައެއް ނޫން ކަމަށާއި އަންނި އިސްތިއުފާ ދެއްވީ ޕާޓީގެ ފަރާތުން ރިޔާސީ ރޭހުގައި ވާދަކުރައްވަންކަން އެނގިވަޑައިނުގަންނަވާ ކަމަށެވެ.

ހުސެއިން ވިދާޅުވީ ޕާޓީގެ ސިޔާސީގޮތުން އެންމެ އިސްފަރާތަކީ ޕާޓީގެ ރައީސް ކަމަށާއި ޕާޓީގެ ޗެއަރޕާސަން އަކީ ޕާޓީގެ އިދާރީ ބައިގެ މަސައްކަތްތަކުގެ އެންމެ އިސްފަރާތްކަމަށް ދެކެވަޑައިގަން ނަވާ ކަމަށެވެ.

” މީގެ ކުރިން އަޅުގަނޑުމެން ޕާޓީގެ ރައީސް ވެސް އިސްތިއުފާ ދެއްވި, އިބުރާހިމް އިސްމާއިލު އިސްތިއުފާ ދެއްވިއިރު ވެސް ކުރިން އެގުމަކާ ނުލާ އިސްތިއުފާ ދެއްވީ.“ ހާއްސަ މަޖިލީހުގެ ތ. އަތޮޅު މެމްބަރ ޑރ. ހުސެއިން ވިދާޅުވި އެވެ.

އެމްޑީPީގެ އަސާސީ ގަވާއިދު ބުނާ ގޮތުން ގައުމީ ޗެއަރަޕާޝަނެއް ނެތް ހާލަތެއްގައި ގައުމީ މަޖިލީހުގެ ޖަލްސާއެއް ނުބޭއްވޭނެ އެވެ. އެއީ ގައުމީ މަޖިލިސް އެއްކުރުމުގެ ބާރުވެރިފަރާތަކީ ގައުމީ ޗެއަރޕާޝަން ކަމަށް ވާތީ އެވެ.

މުހައްމަދު ވަޖީހު އިބުރާހިމް ވިދާޅުވީ ރޭ އަންނި ނިންމި ނިންމުމަކީ ޕާޓިއަށް ދިން ވަރަށް ބޮޑު ދެރައެއް ކަމަށާއި އެބޭފުޅާ އިސްތިއުފާ ދޭންބޭނުންނަމަ އެކަންކުރެވޭނެ ވަރަށް ރީތިގޮތް ވެސް ހުންނާނެ ކަމަށެވެ.

” ރޭގަ ޖަލްސާ ނިންމާލައްވަމުން އޭނާ ވިދާޅުވީ މިހާރު ތިމަންނަ އިސްތިއުފާ ދީފީމޭ ވިދާޅުވުމުން ޕާޓީ ހިންގުން މިވަނީ ގާތްގަނޑަކަށް ހުއްޓުވުމަކަށް އައިސްފައި.“ ވަޖީހު ވިދާޅުވި އެވެ.

ވަޖީހު ވިދާޅުވީ އަންނި އަމަލު ކުރެއްވީ ސިޔާސީ ޕާޓީގެ ޗެއަރޕާސަން އަމަލުކުރައްވާނެ ގޮތަކަށް ނޫން ކަމަށާއި އެނިންމުމަކީ ޕާޓީގެ ކުރިމަގަށް ބަލާލުމެއް ނެތި ނިންމި ނިންމެއް ކަމަށެވެ.