ތިރީގައި އެވަނީ އެމް.ޑީ.ޕީގެ ރިޔާސީ ކެންޑިޑޭޓަށްވުމަށް ކުރިމަތިލެއްވުމަށް ނިންމަވާފައިވާ އެ ޕާރޓީގެ ރައީސް ޑރ. މުހައްމަދު މުނައްވަރު ޖަޒީރާނޫޙުގެ އަހުމަދު މުހްސިނަށް ދެއްވާފައިވާ ޚާއްސަ އިންޓަވިއު އެކެވެ.

ރާއްޖޭގެ ސިޔާސީ މަޝްރަހް މިހާރު މިއޮތީ ކިހިނެތް ކަމަށް ދެކިވަޑައިގަންނަވަނީ؟

ރާއްޖޭގައި ސިޔާސީ ޕާޓީ އުފެދުނުއިރު މިއުފެދުނީ ދެ ބަޔަކަށް. އެއީ ޕާޓީ އުފައްދައިގެން އިސްލާހު ގެނައުމަށް މަސައްކަތް ކުރި ބަޔަކާއި ވެރިކަމުގައި ތިބި މީހުން އުފެއްދި ޕާޓީއެއް. ދެން ވަރަށް ބޮޑެތި ދަތިތަކާއެކު މިގޮތަށް ކުރިއަށްދާއިރު އެންމެންވެސް މިއެދެނީ މިނިވަން އިންސާފްވެރި އިންތިޚާބަކަށް. އަނެއް ބަޔަކު މިމަސައްކަތް ކުރަނީ 30 އަހަރު ދުވަހުގެ ތެރޭގައި ކަންކޮށްފައިވާ ޚުދުމުޚްތާރު ނުފޫޒުގެ ތެރޭގައި އިންތިޚާބު ބޭއްވުމަށް. ޤައުމުގެ މަސްލަހަތު ހިފެހެއްޓޭނީ މިނިވަން އިންތިޚާބެއް ބޭއްވިގެން. ހަމަނުޖެހުމާއި ހަލާކުގެ ތެރެއަށް ވައްޓާނުލާ ކޮންމެ މީހަކަށް ވެސް އެމީހަކު ބޭނުންވާ ގޮތަށް ވޯޓު ދެވޭނެ ގޮތެއް ހެދިގެން މިކަން ކުރެވޭނީ.

ސަރުކާރުގައި ހުންނަވައިގެން އިސްލާހެއް ގެނެވޭތޯ އެއްވެސް މަސައްކަތެއް ކޮށްފައިވާނެތޯ؟

ރައީސްގެ މަޝްވަރާ މަޖިލީހުގެ މެންބަރެއްގެ ގޮތުގައި ހުރެގެން ޤާނޫނުލް އުޤޫބާތުގެ 38 ވަނަ މައްދާ އުވާލާ އެމާއްދާ އިސްލާހް ކުރަންޖެހޭނެ ކަމަށް އެންމެފުރަމަ ވާހަކަދެއްކީ އަޅުގަނޑު. އެމާއްދާ އޭރު އޮތްގޮތުން ސަރުކާރުގެ މުވައްޒަފަކާ ދިމާލަށް ބަލައިލެވޭގޮތަކުން ވެސް ހައްޔަރުކޮށް އަދަބު ދިނުމުގެ ފުރުސަތު އޮވޭ. އެއީ އެންމެ ފާހަގަކޮށްލެވޭ ސިގްނިފިކަންޓް ކަމަކީ. އަދްލުއިއންސާފްގެ ދާއިރާއަށް މީހުން ތަމްރީނުކުރުން އެންމެ މުހިއްމު ކަމަކަށް ދުށީ. އެގޮތުން އަޅުގަނޑު ބައިވެރިވެގެން ޤާނޫނީ ރޮނގުން މައުހަދުގައި ޑިޕްލޮމާ ފެންވަރަށް ކިޔަވައިދޭން ފެށީ. އެކޯހުގެ ޤާނޫނީ ހުރިހާ މާއްދާއެއް ކިޔަވައިދިނީ އަޅުގަނޑު އެކަނި. އެދުވަހު ކިޔެވިކުދިން މިހާރު އެންމެ ކުރީގައި ވަކީލުންނަށް އެއުޅެނީ.

އަޑު އިވޭ އެމްޑީޕީގެ ތެރޭގައި ވަރަށް ބޮޑެތި ހަމަނުޖެހުންތަކެއް އެބައުޅޭ ކަމަށް އެއީ ތެދެއްތޯ؟

ޕާޓީއެއް ތަޢާރަފްކޮށްފައި އެބަޖެހޭ ސިޔާސީ ޕާޓީތައް ބައިވެރިވާ އިންތިޚާބެއް ބާއްވަން. ޤާނޫނު އަސާސީ އޮތް ގޮތުން ޤާނޫނޫ އަސާސީ އިޞްލާޙުކޮށްގެން އެފަދަ ފުރުސަތެއް ދޭން ސަރުކާރުން ބޭނުންވީ. ޤާނޫނު އަސާސީ އިޞްލާޙުކޮށްފައި ދެން މިކަން ކުރިނަމަ އެންމެ ރަނގަޅު ގޮތަކީ. މިހާރު މިވީގޮތަކީ ސަރުކާރު ހިންގަވަން ތިއްބެވި ބޭފުޅުން އެބޭފުޅުންގެ އަމިއްލަ މަސްލަޙަތު ސިޔާސީޕާޓީއަކަށް ބަދަލުވީ. ބަދަލުވުމާއެކުގައި ސިޔާސީ ޕާޓީގެ ދައުރު ރައްޔިތުންނަށް އޮޅޭގޮތްވީ. ސަރުކާރު ހިންގަން ތިއްބެވި ބޭފުޅުންގެ ޕާޓީ ނޫން އެހެން ހުރިހާ ޕާޓީތަކަކީ އެއީ ޤައުމުގެ ދުޝްމަނުން ކަމަށް, ދީނުގެ ދުޝްމަނުންކަަމަށް. ސިފަކުރަމުން ދިޔައީ. އެހެންވީމަ އަޅުގަނޑުމެންނަށް ނުބައި ފައެއްގައި ނުބައި ފިޔަވަޅެއްގެ މަތިން ފަށައިގަނެވުނީ. މިދެންނެވި ކަހަލަ ފިއްތުންތަކެއްގެ ތެރޭގައި ޑިމޮކްރަސީއަށް މަސައްކަތްކުރަމުން އަންނައިރު ހަމަކޮންމެ ހިނދެއްގައި ވެސް, އެލިބެނީ ހަމަ ވަރަށް ބޮޑު އުނދަގޫ ތަކެއް. ފަށައިގަނެގެން ސިޔާސީ ޕާޓީ ބިނާ ކޮށް ދަސްކުރާ މަރުޙަލާގައި އަޅުގަނޑުމެން އެންމެ އެދޭ ގޮތަށް ކަންތައްތަކެއް ނުހިނގާނެ. އެގޮތަށް ބަލާއިރުގައި ހަމަ ކޮންމެ ޕާޓީއެއްގެ ތެރޭގަވެސް އެފަދަ ކަންތައްތައް ހުންނާނެ. އެގޮތަށް ބަލާއިރު އެމް.ޑީ.ޕީގެ ތެރޭގައި ވެސް ޚިޔާލު ތަފާތުވުން ތައް ހުންނާނެ.

ޕާޓީން ކުރިމަތި ލައްވާ ކެންޑިޑޭޓެއްގެ ގޮތުގައި މުނައްވަރު ހޮވިވަޑައި ނުގެންފި ނަމަ އަމިއްލައަށް ކުރިމަތި ލައްވަފާނަންތޯ؟

އަޅުގަނޑަކީ ޢާއްމު މެންބަރުންގެ ވޯޓަކުން ޕާޓީއަށް މިވަގުތު ހޮވިފަ ހުރި މީހާ. އަޅުގަނޑުގެ ސިޔާސަތު ތަކުގެ ތެރޭގަ ހިމެނޭ ޕާޓީގެ ސިޔާސަތު ކުރިއެރުވުން. އެހެން އޮތްއިރު ސިޔާސީ ގޮތުން އެމް.ޑީ.ޕީގެ އިސްކޮށް ހުރި މީހަކު, ޤައުމީ އިންތިޚާބަށް ވާދަކުރާނެ ކެނޑިޑޭޓެއް ހޮވަން ބައްވާ އިންތިޚާބަކަށް ކުރިމަތި ނުލުމަކީ ވަރަށް އައިބުކަމެއް. ވަރަށް ގިނަ ސުވާލުތަކެއް އުފެދޭ ކަމެއް. އަނެއްކާ އަޅުގަނޑު ދެކޭގޮތުގައި އަޅުގަނޑު ވޯޓް ދިން މެންބަރުން ވެސް އެދޭނެ ކަމެއް ނޫން އެއީ. އެހެންވީމާ ބަލަން ވާނީ އަޅުގަނޑު ކުރިމަތިލާނެ ކަމަށް. ދެން އެއް ވެސް އިންތިހާބަކުން ޗެލެންޖެއް ނެތި މީހަކު ހޮވިގެން ނުވާނެ ވީމާ އަޅުގަނޑު ނޫން މީހަކުވެސް ހޮވިދާނެ. އެފަދަ މީހަކަށް އަޅުގަނޑު ވެސް ބޯލަނބަން ޖެހޭނެ . އެރޫހުގައި އަޅުގަނޑު ވެސް މިއުޅެނީ. އެގޮތަށް އަޅުގަނޑު ހަދާނަން.

ގިނަބަޔަކު ބުނޭ ގިނަ ކެނޑިޑޭޓުންތަކެއް ކުރިމަތިލައްވައިފިނަމަ މައުމޫނު ކާމިޔާބު ކުރައްވާނެއޭ. އެހެން ވެދާނެބާ؟

މައުމޫނަކީ ދެން އަންނަ ރިޔާސީ އިންތިޚާބެއްގައި ކަނޑައެޅިގެން ވާދަ ނުކުރެއްވޭނެ ބޭފުޅެއް, އެއީ އަޅުގަނޑު ޤަބޫލުކުރާ ގޮތް. އޭގެ ވަރަށް ގިނަ ޤާނޫނީ އަދި ސިޔާސީ ސަބަބުތަކެއް ވެސް އެބަހުރި. އެހެންވީމަ އަޅުގަނޑު ޤަބޫލެއް ނުކުރަން ދެން ރާއްޖޭގަ ބޭއްވޭ އިންތިޚާބެއްގައި މައުމޫނު ކުރިމަތި ލެއްވޭނެ ކަމަކަށް. އަޅުގަނޑު ޤަބޫލުކުރާ ގޮތުގައި ޕާޓީތަކުން ގިނަ ކެންޑިޑޭޓުން ނުކުތުމަކީ އިއްތިހާދަށް ހުރަސްއެޅޭނެ ކަމެއް ނޫން. އިއްތިހާދުގެ ކުރިން ވެސް ޑޮކްޓަރ ހަސަން ސަޢީދު އޮތީ ރިޔާސީ އިންތިޚާބުގައި ވާދަކުރައްވާނެ ކަމަށް އިޢުލާން ކުރައްވާފައި. އައިޑީޕީން އޮތީ އުމަރު ނަސީރު ހޮއްވަވާފައި. އޭރުވެސް އަދާލަތު ޕާޓީން އޮތީ ބުނެފަ ޕާޓީން ކެންޑިޑޭޓަކު ނުނެރޭނެ ކަމަށް. އެމް.ޑީ.ޕީގެ އަސާސީ ޤަވާޢިދު ބުނަނީ އެމް.ޑީ.ޕީގެ މެންބަރުންގެ ވޯޓަކުން އެމް.ޑީ.ޕީގެ ކެނޑިޑޭޓަކު ހޮވަން ޖެހެއޭ. އެހެންވީމާ އެއީ އިންތިހާދުގެ ފަރާތުން އެކެންޑިޑޭޓަކު ނެގުމަށް, ހުރަސްއެޅޭ ކަމެއް ނޫން. އެއީ ކޮންމެ ޕާޓީއަކުން ވެސް ނުކުންނާނެ މީހާ ވެސް ފެނިގެން ކަންނޭނގެ މިޕާޓީތަކުން އެއްކެންޑިޑޭޓަކާމެދު އެއްބަސް ވެވޭނީ

މައުމޫނަށް ކުރިމަތި ނުލެއްވޭނެއޭ ތި ވިދާޅުވަނީ.. ؟

އަޅުގަނޑު ޤަބޫލުކުރާ ގޮތުގައި މިހާރު ރާއްޖޭގެ ދެން އޮންނަ ރިޔާސީ އިންތިޚާބަކަށް މި ޤާނޫނު އަސާސީ އިޞްލާޙު ކުރެވިގެން އެ އިސްލާޙުކުރެވޭ ޤާނޫނު އަސާސީ ގެ ދަށުން ބޭއްވޭ އިންތިޚާބަކަށް މައުމޫނު ޢަބްދުލްޤައްޔޫމަކަށް ކުރިމައްޗެއް ނުލެއްވޭނެ. ލައިފިއްޔާ އެ ވެވެނީ ޤާނޫނު އަސާސީއާ ޚިލާފަށް. އެކަން ހުއްޓުވުމަށްޓަކައި ޤާނޫނު އަސާސީ, އާ އެއްގޮތަށް ޢަމަލުކުރުމަށް އަޅުގަނޑުމެންނަށް ކުރެވެން އޮތް ހުރިހާ މަސައްކަތެއް އަޅުގަނޑު ކުރާނަން.

އެމްޑީޕީގެ ރައީސްކަމާ ހަވަލުވިފަހުން މުނައްވަރަށް އެމްޑީޕީއަށް ކޮށްދެވުނީ ކޮންކަމެއް؟

އަޅުގަނޑު ދެކޭ ގޮތުގައި ޕާރފޯމަންސް އެކި މީހުން މެޝަރ ކުރާނީ އެކިގޮތަށް. އަޅުގަނޑު އަމިއްލައަށް ބަލާއިރުގައި އަޅުގަނޑު ޕާޓީގެ ރައީސްކަމާ ހަވާލުވިއިރު ޕާޓީގެ އިދާރީ ޕާޓީ ހިންގަވަން ތިއްބެވި ބޭފުޅުން, ޕާޓީގެ ޕާލަމެންޓްރީ ގްރޫޕާ, ދޭތެރޭގަ އޮތީ ވަރަށް ބޮޑަށް ގުޅުން ކެނޑިފައި. އެހެން އޮއްވާ ޕާޓީގެ ޕާލިމެންޓްރީ ގްރޫޕްގެ މެންބަރުން އަނެއްކާ ވެސް ޕާޓީގެ ހިންގަވަން ތިއްބެވި ބޭފުޅުންނާ ގުޅުން ބަދަހިވެގެން ދިޔަ އަޅުގަނޑު ޕާޓީގެ ކެބިނެޓް, ޝެޑޯ ކެބިނެޓް ނެގުމުން ވެސް. އެ ގުޅުން ބަދަހިވުމުގެ ސަބަބުން ޤާނޫނު އިސްލާޙުކުރުމުގެ މަސައްކަތް ރައްޔިތުންގެ ޚާއްޞަ މަޖިލީހުގެ ތެރޭގައި ހިގުމަށް ފަސޭހަވެގެން ދިޔަ. ބަރުލަމާނީ ކެމްޕޭން އަޅުގަނޑުމެން ކުރަމުން ދިޔައިރުގައި ޕާޓީ ޕްރޮމޯޓް ކުރުމަށް, ވަރަށް ގިނަ ކަންތައްތަކެއް ކުރެވުނު. އެކަން ވަރަށް ކާމިޔާބުވެސްމެ.

ޒަކީ ކަނޑައެޅިގެން ވިދާޅުވޭ މައުމޫނުގެ ޚުދުމުޚްތާރު ސިޔާސަތުގައި ޖެހިފައި ތިބި ބޭފުޅުންނަށް ޑިމޮކްރަސީއެއް ނުގެނެވޭނެޔޭ. އެލިސްޓުގައި މުނައްވަރު ހިމެނޭކަމަށް ފާހަގަ ކުރެވޭ ކީކޭތޯ ވިދާޅުވާނީ؟

އަޅުގަނޑަށް ޒަކީ ތިޔަ ވިދާޅުވި އެއްޗެއްގެ މާނައެއް, މިދެންނެވީ ޒަކީ ވިދާޅުވީ ޚުދުމުޚްތާރުވެރިކަމުގެ ސަޤާފަތާއި އެ ވިދާޅުވި ޘަޤާފަތާ ބެހުމަކީ ކޮބައިކަމެއް ނޭނގެ. ނޭނގެއޭ މިދެންނެވީ ޒަކީއަށް އެނގިވަޑައިގަންނަވާނެ. ތާ އެހެން ވިދާޅުވީ ޒަކީ ކަމަށްވާތީ, އަޅުގަނޑަށް އެނގޭ އެއްޗަކީ ދިވެހިރައްޔިތުންގެ ޑިމޮކްރެޓިކް ޕާޓީގެ ރައީސަކަށް އަޅުގަނޑު އެޕާޓީގެ މެންބަރުން ވޯޓަކުން ހޮވާފަ ހުންނާނީ އަޅުގަނޑާ ދޭތެރޭގަ އެޕާޓީން ވޯޓްލީބަޔަކު އިތުބާރު ކޮށްގެންކަން.

އެމްޑީޕީގެ ފަރާތުން ހުށަހަޅާ މެނިފެސްޓޯ އަކީ ކޮބާ؟

ޕާޓީގެ މެނިފެސްޓޯ އޮންނާނީ ކުރިންވެސް ނިމިފައި. އެހެން ނަމަވެސް ރިޔާސީ އިންތިޚާބަކަށް އަދި މަޖިލީހުގެ އިންތިޚާބަކަށް އަޅުގަނޑުމެން ދާއިރުގައި, ރައްޔިތުންނަށް އެންމެ ފައިދާ ކުރާނެ ގޮތެއް ނިންމަން ޖެހޭނީ ޕާޓީގެ އެތެރޭގެ އިންތިޚާބު ބައްވާފައި.

އާ ޕާޓީއެއް ހަދާ ވާހަކައާއި ޕާޓީއަކާ ގުޅޭ ވާހަކަ ފެތުރުނު. ކީކޭތޯ ވިދާޅުވާނީ؟

ވަރަށް އާދަޔާ ޚިލާފު ވާހަކައެއް ތީ. އެއްވެސް މަޖްބޫރުކަމެއް ނެތި ހިތުން ރުހުމުން ވޮލަންޓްރީ ގޮތުން އެންމެ ގިނަ މީހުން ވަދެފަ ތިބި ޕާޓީއަކީ އެމް.ޑީ.ޕީ. އަދި ދިވެހިރާއްޖޭގެ ތާރީޚުގައި މުޅިރާއްޖޭގެ ނިސްބަތުން ގިނަ ކެންޑިޑޭޓުންތަކެއް ބައިވެރިވެގެން އޭގެތެރެއިން ގިނަ ކެންޑިޑޭޓުންތަކެއް ބައިވެރިވެގެން ވޯޓްލައިގެން ގިނަ ބަޔަކު ގިނަ ކެންޑިޑޭޓުންނަށް ބޭއްވުނު ހަމައެކަނި އިންތިޚާބަކީ އެމް.ޑީ.ޕީގެ ރިޔާސީ އިންތިޚާބު. އެއިންތިޚާބުގައި ހަމައެކަށީގެންވާ ކެންޑިޑޭޓުން ތަކަކާއެކުގައި, ވާދަކޮށްގެން އެކަށީގެންވާ ރަގަޅު ބޮޑު އަޣުލަބިއްޔަތަކުން ކާމިޔާބު ހޯދައިގެން, މެންބަރުންގެ މެންޑޭޓާ އެއްކޮށް ރައީސަކަށް އަޅުގަނޑު ހޮވުނީ. އެހެންވީމާ އަޅުގަނޑު އެހެން ސިޔާސީޕާޓިއެއް ހަދާކަށް ނުޖެހޭ އަދި އެހެން ޕާޓީއަކާ ގުޅޭކަށް ވެސް އަޅުގަނޑު ނުޖެހޭ. އެހެންވީމާ އަޅުގަނޑުގެ ކުރިމަތީގަ އޮތީ އެމް.ޑީ.ޕީ ކުރިއެރުވުން.

ރިޔާސީ ކެންޕޭނަކަށް ބޭނުންވާ ވަރަށް ފައިސާ އެބަހުރިތޯ ފައިސާ ލިބޭނޭގޮތެއް އެބައޮތްތޯ؟

މިހާރުން މިހާރަށް ހުރިހާ އިންތިޚާބަކަށް ބޭނުންވާ ފައިސާ އެބަހުއްޓެކޭ ދެންނެވޭކަށް ނެތް. ފަންޑްރައިޒް ކުރަން ޖެހޭ. އޮތީކީ އެންމެ އިންތިޚާބެއް ނޫން. އެކަށީގެންވާ ވަރަށް ފައިސާ ބޭނުންވޭ.

ޕާޓީގެ ކެންޑިޑޭޓެއްގެ ގޮތުގައި އަންނި އަންނާނެ ކަމަށް މިހާރު އެބަބުނޭ. ކުރިން ބުނީ ނާންނާނަމޭ. ކީކޭތޯ ވިދާޅުވާނީ؟

އަޅުގަނޑަށް އަޑުއެބަ އިވޭ ޕާޓީގެ ޗެއަރޕާސަން ނަޝީދު ކުރިމަތި ލައްވަފާނެ ކަމުގެ ޢިޝާރާތެއް ނުވަތަ ލައްވަފާނެ ކަން ދޭހަވާކަހަލަ ގޮތަކަށް އިވެމުން އެބަދޭ.

އަންނިއާ ވާދަކޮށްގެން ވިން ވެދާނެ ކަމުގެ ކިހާވަރެއްގެ ގެރެންޓީ އެއް އެބައޮތްތޯ.

އަޅުގަނޑު ކުރިމަތި ލާނީ އަޅުގަނޑު އިންތިޚާބު ކާމިޔާބު ކުރެއްވޭނެ ކަމަށް ޤަބޫލުކޮށްގެން. އެޔަޤީން ކަންމަތީގައި. ދެން. އިންތިޚާބުގެ ނަތީޖާ އެގޭނީ ވޯޓް ލީމާ. އަޅުގަނޑު ވެސް މެންބަރުންނަށް އަޅުގަނޑު ވެސް ގެންގޮސްދޭނެ މެސެޖްތަކެއް ހުންނާނެ. އެއީ އަޅުގަނޑު ދޭން ޖެހޭ ޔަޤީންކަމެއް އޮންނާނެ. ކެންޑިޑޭޓެއްގެ ޒިންމާއަކަށް ވާނީ ޕާޓީ އަށް އެއިންތިޚާބު ކާމިޔާބު ކޮށްދިނުން. ކަމާ އެކަމާ ކުރަންޖެހޭ ކަންތަކެއް ވެސް ހުންނާނެ. މިހުރިހާ ކަމަކަށް, ބަލާފައި ކާމިޔާބު ކުރެވިދާނެ ކަމުގެ ޔަޤީންކަން އޮތުމުން އަޅުގަނޑު ކުރިމަތިލާނީ,

ވިން ނުވާ މީހެއްގެ ހަޔާތަށް ސިޔާސީ ބަނަކަމެއް އަންނާނެ. އެކަމުގެ ސަބަބުން ލިބިދާނެ ގެއްލުމަކާމެދު ދެކެނީ ކީކޭތޯ؟

އަޅުގަނޑަށް ހީވަނީ އަޅުގަނޑުމެން އިސްލާހީ މަސައްކަތަށް ނުކުތީ, ހަމަ ޤައުމީ މަސްލަހަތަށް އިސްކަންދީގެން. އެގޮތުން ހަމަގައިމުވެސް އަޅުގަނޑުމެންގެ ސިޔާސީ ޙަޔާތަށްވުރެ އަޅުގަނޑުމެންނަށް މުހިއްމީ މަސައްކަތް. އަޅުގަނޑުމެން ފަށައިގަތް ދިވެހިރާއްޖެއަށް ޑިމޮކްރެސީ ގެނައުމަށް ދިވެހިރާއްޖޭގެ ރައްޔިތުންގެ ޙައްޤުތައް ހޯދައިދިނުމުގެ މަސައްކަތް އަދި މި އިންތިޚާބު ނާކާމިޔާބު ވުމަކުން, އަޅުގަނޑުމެން ކުރަން އޮތް މަސައްކަތްތަކަށް ހުއްޓުމެއް ނާންނާނެ.

އަންނި ކުރިމަތިލައްވައި ހަސަން ސައީދަށް ރަނިން މޭޓަކަށް އައުމަށް ދައުވަތު ދެއްވި ވާހަކަ ހަސަން ވަނީ ވިދާޅުވެފައި. އެއީ އަސާސީ ޤަވައިދާ ޚިލާފް ކަމެއް ކަމަށް ބުނޭ. ކީކޭތޯ ވިދާޅުވާނީ؟

އަޅުގަނޑު ދެކޭގޮތުގައި އަޅުގަނޑަށް މަޢުލޫމާތު ލިބިފައިވާ ގޮތުން އަޅުގަނޑަށް ތިއާ މެދުގައި ވަކިއެއްޗެއް ދެންނެވޭކަށް ނެތް. އަޅުގަނޑަށް މަޢުލޫމާތު ލިބިފައި އޮތް ގޮތުން, ޕާޓީގެ ޗެއަރޕާސަން އެފަދަ ހުށަހެޅުމެއް ހުށަހަޅުއްވާފައި އޮތް ކަމަކަށް ނުވޭ. ދެން އެހެން ނަމަވެސް, އަނެއް ފަރާތުން ބުނެދޭނީ ޝަހީދުމެންގެ ވާހަކަފުޅުން ދޭހަވަނީ އެހެން ގޮތެއް. އެހެންވީމާ, އަޅުގަނޑަށް, މިކަމަކީ އަޅުގަނޑަށް, ވަކިއެއްޗެއް ދެންނެވޭނެ ކަމެއްނޫނޭ.

ހަސަން ސައީދު އެމްޑީޕީއާ ގުޅި ރިޔާސީ ރޭހުގައި ވާދަކޮށް ކާމިޔާބުވެ ދެވަނަ މީހެއްގެ ގޮތުގައި މުނައްވަރު އަތުވެއްޖިއްޔާ ކަންތައް ކުރައްވާނީ ކޮންގޮތަކަށްތޯ.

އަޅުގަނޑު އޮންނާނީ ވަރަށް ސާފުކޮށް ބުނެފައި އަޅުގަނޑު ދެކޭގޮތް. އެއީ މި ދިވެހިރާއްޖެއަށް މިހާރު މިގެނެވޭ އިޞްލާޙުތައް ގެނައުމުގަ އި އަދި އިތުރަށް ވެސް ކުރިއަށް އޮތްތާނގައި ވެސް ވެހިކަލަކަށް ވާނީ އެމްޑީޕީއޭ. އެމް.ޑީ.ޕީއޭ ޤައުމުގެ ހުންގާނުގައި މަސައްކަތް ކުރަންޖެހޭ ސިޔާސީ ޕާޓީއަކީ. އެހެންވީމަ ޤައުމަށް އެންމެ ފައިދާބޮޑު ގޮތަކީ ވަކިވަކިން ތިބުމަށްވުރެ ދުރުގަ ތިބުމަށްވުރެ މިޕާޓީއާ ގުޅިގެން އިސްލާހުކުރުމުގައި ބައިވެރިވުން. އަޅުގަނޑު ވާނެ ޑޮކްޓަރ ހަސަން ސައީދުވެސް ޑޮކްޓަރ ޝަހީދުވެސް އަދި ޑޮކްޓަރ މުހައްމަދު ވަހީދު ހަސަން މަނިކަށް ވެސް ދައުވަދު ދެއްވާފައި. ހުރިހާ ބޭފުޅުންނަށް ވެސް އަޅުގަނޑު ދަންނަވާފައި އޮންނާނީ ވަޑައިގަންނަވާށޭ މިޕާޓީއާ ގުޅިވަޑައިގެން މިޕާޓީން ރިޔާސީ ކެންޕޭނުގައި ކުރިމަތިލައްވައި ކާމިޔާބު ކުރައްވާށޭ. ޕާޓީގެ މެންބަރުން ހޮއްވަވާ ބޭފުޅަކާ އެކީ އެބޭފުޅެއްގެ ފަހަތުގައި މަސައްކަތް ކުރަން މިހުރީ ތައްޔާރަށް

ބައެއް މީހުން ބުނޭ ޕާޓީގައި އަންނިގެ ނުފޫޒު ވަރަށް ބޮޑޭ. ޕާޓީގެ އިސްސަފަށް އައި ބައެއް ބޭފުޅުން ވެސް ދިޔައީ އެހެންވެގެންނޭ މުނައްވަރަށް އެފަދަ ނުފޫޒެއް އެބައޮތްތޯ؟

އަޅުގަނޑަށް މަގުދައްކާ އެއްޗަކީ ޕާޓީގެ މެނިފެސްޓޯ އާއި ޕާޓީގެ ކޮންގްރެސް އިން ކަނޑައަޅާ ސިޔާސަތު. އެކަންތައްތަކުގެ ތެރޭގައި އަޅުގަނޑަށް މަސައްކަތް ކުރެވެން ވާނެ. ދެން ސިޔާސީޕާޓީގެ މަސައްކަތަކީ ތަފާތު ޚިޔާލުތަކުގެ މީހުން ތިބޭނެ ކަމަށް ބަލައިގެން އެތަފާތުވުން ތަކުގެ ތެރޭގަ އި ޚިޔާލު އެއްގޮތް ކުރަމުން ޕާޓީގެ މެންބަރުންގެ އެއްބައިވަންތަކަން ދަމަހައްޓަމުން ޕާޓީގެ މަޤްޞަދާ ދިމާއަށް ދަތުރުކުރުން. އެހެންވީމަ އަޅުގަނޑު ޤަބޫލުކުރާ ކަމެއް, ޚިޔާލު ތަފާތުވުމަކީ އަދި އެކިކަންކަމުގަ ދެބަސްވުން ހުރުމަކީ. އަޅުގަނޑުމެންގެ ސިޔާސީ ހުނަރުވެރިކަމަކީ މިދެންނެވި ޚިޔާލު ތަފާތުވުމާއި ދެބަސްވުން ތަކުގެ ތެރޭގައި އެކުރާ ކަމެއްގެ ޢާއްމު މަސްލަޙަތަށް ނުވަތަ އެކުރާ ކަމެއްގެ އާއްމު މަޤްޞަދު އޭގެން ޙާސިލްކުރެވޭ ގޮތަށް އަޅުގަނޑުމެން އެންމެން އެއްކޮށް, މަސައްކަތް ކުރުން.

އިންތިޤާލީ މަރުހަލާގައި މީޑިޔާ މިނިވަން ކުރަން ކުރަން އުޅުނު ކަންތައްތައް ކޮބާތޯ؟

އެފަދަ ލިޔުމެއް މިހާރު ވަނީ ގާތްގަނޑަކަށް ތައްޔާރުކޮށް ނިމިފަ.

ބަޖެޓް ބޭނުންކޮށްގެން މައުމޫނު ކުރައްވާނެ ކަންތައް ހުއްޓުވާނެ ކަމަށް ވިދާޅުވި އެކަން ކޮބައިތޯ؟

ބަޖެޓްގެ ކަންތައް ވާގޮތަކީ މީގެ ތެރޭގަ އެއްކަމަކީ ރަސްމީ ހައިސިއްޔަތަކުން ކުރާ ދަތުރުތަކުގެ ނަމުގައި ކެންޕޭނު ބާއްވާ ދަތުރުކުރުން. އެކަން ހުއްޓުވުމަށް އަޅުގަނޑުމެންނަށް ކުރެވެން އޮތް މަސައްކަތަކީ ބަޖެޓް ރައްޔިތުންގެ މަޖިލީހުގައި އޮތް ސިޔާސީ ޕާޓީތައް އެކުލެވޭ ކޮމިޓީއެއްގެ ވެރިންގެ ދަށަށް ގެންދިއުން, އެކަން ކުރެވެން އޮތީ ޤާނޫނު އަސާސީ އިސްލާޙުވެ ނިމުމުން އެއިޞްލާޙު ތަކަށް ޢަމަލުކުރަން ފެށުމުން, އެވެސް އިންތިޤާލީ މަރުޙަލާއެއްގެ ގޮތުގައި. އެހެން ނަމަވެސް އަދި. އެކަމަށް އެއްވެސް ސިފައެއް އައިސްފައެއް ނެތް. އެކަން ވެސް އެހިމެނެނީ މިނިވަން އިންސާފުވެރި އިންތިޚާބެއް ބޭއްވުމާ ގުޅޭ ކަމަކަށްވާތީ އެމަސައްކަތުގެ ތެރޭގަ އެކަން ކުރެވެމުންދާނެ ކަމަށް އަޅުގަނޑު ޤަބޫލުކުރަނީ.

މިނިވަން އިންތިޚާބެއް ބޭއްވޭވަރަށް ހާލަތު ބަދަލުވެއްޖެތޯ؟

އަދި ނުވޭ. އަޅުގަނޑުމެން ދެކޭގޮތުގައި މައުމޫނު ޢަބްދުލްޤައްޔޫމު ރައީސުލްޖުމްހޫރިއްޔާ އަކަށް ހުންނަވައިގެން. އޭނައަށް މިހާރު އޮތް ބާރުވެސް އިޚްތިޔާރުތައް ވެސް އޮވެގެން ދިވެހިރޭއްޖޭގައި މިނިވަން އިންތިޚާބެއް ނުބޭއްވޭނެ.

އިންތިޚާބަށް ފަހު ބަދަލެއް އަތުވެދާނެތޯ

އަޅުގަނޑުމެން ޔަޤީން ކުރަނީ ރާއްޖޭގައި ދެން އޮންނަ އިންތިޚާބަކީ މިނިވަން އިންސާފުވެރި އިންތިޚާބެއްކަމަށް ވާނެ ކަމަށް. އިސްލާޙު ތަކާ ހެޔޮބަދަލު ގެނެސްދޭނެ ކަމަށް ވަޢުދުވެގެން އެމީހުން, އެދައްކާ ވާހަކައާ އެމީހުން ހުށަހަޅާ ހުށަހެޅުންތަކާ އެމީހުންގެ ޤާބިލިއްޔަތު ރައްޔިތުން އިތުބާރުކުރާ ބަޔަކު ހޮވޭނީ. އެހެން ކަމަށް ވެއްޖިއްޔާ އެބަޔަކު ސަރުކާރު ހިންގާނީ ރައްޔިތުން އެދޭ ގޮތަށް ކަމަށް ޤަބޫލުކުރަނީ.