ޖައުސާ ފިޝަރީޒް ޕްރޮޖެކްޓްއިން ހއ ހުވަހަންދޫ ޕްރޮޖެކްޓްގެ ބަދަލުގެ ގޮތުގައި ސަރުކާރުން އެކުންފުންޏަށް ދޭން ނިންމި ބަދަލުގެ އިތުރުން އިތުރު 96.3 މިލިއަން ރުފިޔާ ހޯދުމަށް ޖައުފަރު އީސާ އާދަމް ފިޝަރީޒް މިނިސްޓްރީއަށް ހުށަހަޅާފައިވާ ސިޓީއެއް ޖަޒީރާއަށް ލިބިއްޖެއެވެ.

ޖަޒީރާއަށް ލިބިފައިވާ މިސިޓީއާއެކު ޖައުސާ ފިޝަރީޒް ޕްރޮޖެކްޓްއިން ޖައުފަރު އީސާ އާދަމަށް ލިބެން ޖެހޭ ޙައްޤު ބަދަލުކަމަށް ޖައުސާއިން ހުށަހަލާފައިވާ ސަމަރީ ރިޕޯޓެއް ހިމަނާފައިވެއެވެ. އަދި އެއީ ނިގޯޝިއޭޓް ކުރުމަށް ހުށަހެޅިފައިވާ ޚުލާސާ ރިޕޯޓެއް ކަމަށް ބުނެފައިވެއެވެ.

ރައްޔިތުންގެ މަޖިލީހުގެ ހއ އަތޮޅު މެންބަރ ޖައުފަރު އީސާ އާދަމް ފިޝަރީޒް މިނިސްޓްރީއަށް ފޮނުވާފައިވާ ސިޓީގައި ބުނެފައިވަނީ އެރިޕޯޓަކީ އެމިނިސްޓްރީގެ ވެރިންނާއެކު ބެއްވި މަޝްވަރާއަކަށްފަހު ހުށަހަޅާ ރިޕޯޓެއް ކަމަށެވެ.

ޕީއޭއަށް ނިސްބަތްވާ ޖައުފަރު ހުށަހަޅާފައިވާ މިރިޕޯޓުގައި ބުނެފައިވާގޮތުން ޖުމްލަ 99،760،000 ރުފިޔާ ލިބެން ޖެހެއެވެ.

ހުވަހަންދޫ ޕްރޮޖެކްޓްގެ ބަދަލެއްގެ ގޮތުގައި ސަރުކާރުން އޭނާއަށް ދޭންޖެހޭ ބަދަލު އޮޑިޓް ކުރުމަށްފަހު ވަނީ ދިނުމަށް ނިންމާ އޭގެން ބައެއް ހަވާލުވެސް ކޮށްފައެވެ.

ޖައުފަރު ފަހުން މިހުށަހެޅި ރިޕޯޓުގައި ހިމެނެނީ ހއ ހުވަހަންދޫގައި ކޮށްފައިވާ އިމާރާތްތަކާއި އިންވެސްޓްމަންޓަށް ބަދަލުގެ ގޮތުގައި ޖައުސާއަށް ނުލިބިވާ އަދަދެއްގެ ގޮތުގައި 3،400،000 ރުފިޔާއާއި, 18 މަސްދުވަސްވަންދެން އިމާރާތް ބެލެހެއްޓުމުގެ އޮޕަރޭޝަނަލް ކޯސްޓްގެ ހައްގު ބަދަލު (ލައިސަންސް ކެންސަލްކުރި ދުވަހުން ފެށިގެން އަލުން ލައިސަންސް ދިނުމާ ހަމައަށް ) 2،700،000 ރުފިޔާގެ އިތުރުން ޖައުސާއަށް ބަދަލުގެ ގޮތުގައި ހއ ހުވަހަންދޫގައި ކޮށްފައިވާ އިންވެސްޓްމަންޓްގެ ލިބެންޖެހޭ ފައިސާގެ ކަންތައްތައް ހަމަނުޖެހި ލަސްވުމުން އޮޕަޗުނިޓީ ކޯސްޓްގެ ގޮތުގައި ލިބެންޖެހޭ ކަމަށް ޤަބޫލުކުރާ ހައްޤު ބަދަލެއްގެ ގޮތުގައި 3،060،000 ރުފިޔާ އަދި ލައިސަންސް ކެންސަލްކޮށްލުމުގެ ސަބަބުން ބިޒްނަސް ލޮސްގެ ބަދަލު 18 މަސްދުވަހަށް(އަލުން ލައިސަންސް ލިބުމާ ހަމައަށް) 30،600،000 ރުފިޔާ ހިމަނާފައި ވެއެވެ.

މީގެ އިތުރުން ރެޕިއުޓޭޝަން ނުވަތަ ބިޒްނަސް އިމޭޖް ގެއްލުމުގެ ރިކަވަރީއެއްގެ ގޮތުގައި 45،000،000 ރުފިޔާއާއި ޕޮލިޓިކަލް އަދި ޕާސަނަލް ކެރިއަރ އިމޭޖަށް ލިބުނު ގެއްލުމުގެ ބަދަލުކަމަށް ބުނެ 15،000،000 ރުފިޔާ ހޯދުމަށް މިރިޕޯޓުގައި ހިމަނާފައިވެއެވެ.

މިބަދަލުތަކާ ބެހޭ ތަފްސީލް ތަކެއްވެސް ޖައުފަރުވަނީ ރިޕޯޓާއެކު ހުށަހަޅުއްވާފައެވެ.

ފުރަތަމަ ޒޯނުން މަސް ގަނެ ބޭރުކުރުމަށް ޖައުސާ އަށް ދެއްވާފައިވާ ހުއްދަ 2004 ވަނައަހަރުގެ ޑިސެމްބަރު 1 ގައި ބާތިލުކުރެއްވުމާ ގުޅިގެން ހުވަހަންދޫ ހއ. އަތޮޅު އޮފީހާ ހަވާލުކުރައްވާފައިވާފައި ވެއެވެ. އެހެންނަމަވެސް އެ ކުންފުނިން އެރަށުގައި ކޮށްފައިވާ އިމާރާތާއި ހަރު މުދަލުގެ ގޮތުގައިވާ ތަކެއްޗަށް ގެއްލުމެއް ވިޔަނުދީ އެތަކެތި ހުރި ހާލަތުގައި ބެހެއްޓުމަށާއި އަގުކޮށް ނިމެންދެން އެ ކުންފުނީގެ މުވައްޒަފުން ބައިތިއްބުމަށް ކުންފުނިން އެދިފައިވާތީ އެ ހުއްދަ އެ ކުންފުންޏަށް ވަނީ ދެއްވާފައެވެ.

ފިޝަރީޒް މިނިސްޓްރީން ބުނެފައިވަނީ 2005 ވަނަ އަހަރުގެ އޭޕްރީލް 8 ގައި ޖައުސާ ފިޝަރީޒް ލިންކަށް ދޫކުރައްވާފައިވާ ހުއްދަ ބާތިލުކުރެއްވީ ސަރުކާރާއި އެ ކުންފުންޏާ ދެމެދު ވެފައިވާ އެއްބަސްވުމާ އެއްގޮތަށް އިންވެސްޓަރުގެ މައްޗަށް ލާޒިމުކުރާ ކަންތައްތަކެއް އެކުންފުނިން ކޮށްފައި ނުވާތީ ކަމަށެވެ.