”ތިމަންނަގެ ތިންމަހުގެ ކުއްޖެއްވެސް ހުރޭ އިގޭތޯ؟ އަޅުގަނޑު ކީއްތޯ ކުރާނީ.“ މިއަދު އޮތް ޝަރީއަތު މަޖިލީހުގައި ގާޒީ މުހައްމަދު މޫސާގެ ސުވާލަށް ޖަވާބު ދެމުން ކުޑަކުޑައަންހެން ކުއްޖާގެ މަންމަ އައިޝަތު ރަޝީދާ މިއަދު ބުންޏެވެ.

މިއަދު ޝަރީއަތުގެ މަޖިލީހުގައި ދެކެވުނު ވާހަކަތަކަށް ބިނާކޮށް ގަޒީ ވިދާޅުވީ އައިސަތު ރަޝީދާ )ކުއްޖާގެ މަންމަ( ކަންތައްތައްތަކެއް ފޮރުވުމަށް މަސައްކަތް ކުރަމުންދާ ކަމަށް ފާހަގަ ކުރެވޭ ކަމަށާއި މިވާހަކައިން ވަރަށް ބޮޑު ސުވާލެއްގެ ޖަވާބު ލިބިގެން ހިގައްޖެ ކަމަށެވެ.

މިއަދު ޝަރީއަތުގެ މަޖިލީހުގައި ގާޒީ ވިދާޅުވީ ހަ އަހަރުގެ ކުއްޖަކާ އެކު ބަދުއަޚުލާގީ އަމަލު ހިންގި ދޮންބައްޕައެއްގެ މައްޗަށް ގައިރު ހާޒިރުގައި ޝަރީއަތް ކުރިއަށް ގެންދަން ޖެހުނީ އޭނާ ދީފައިވާ އެޑްރެހުގައި ނެތުމުގެ ސަބަބުންނާއި އޭނާ ހޯދުމަށް އިއުލާނުކޮށް އޭނާ ފެނިފައި ނުވާތީ ކަމަށެވެ.

ހަ އަހަރުގެ ދޮންދަރިއަކާ އެކު ބަދުއަހުލާގީ އަމަލު ހިންގާފައިވާ ކަމަށް ބުނެ, ދައުލަތުން ދައުވާ ކުރަމުންދަނީ ޅ. ހިންނަވަރު, ސުޕަނައިޓު, އިބްރާހިމް މުހައްމަދުގެ މައްޗަށެވެ.

އިބްރާހިމް މުހައްމަދުގެ މައްޗަށް ދައުލަތުން ދައުވާ ކުރަނީ ދިވެރާއްޖޭގެ ގާނޫނުލް އުގޫބާތުގެ ހެއްކާ ބެހޭ ގާނޫނުގެ 6 މާއްދާގެ ދަށުން ނެވެ.

މިއަދު ޝަރީއަތުގެ މަޖިލީހުގައި ދައުލަތުން ބަޔާން އިއްވަމުން ދައުލަތުގެ ވަކީލާ ވިދާޅުވީ ދައުލަތުން ދައުވާ ކުރަނީ އެކުއްޖާގެ މަންމަ އައިޝަތު ރަޝީދާ މޯލްޑިވްސް ޕޮލިސް ސާރވިސްއަށް ދީފައިވާ ބަޔާނާއި މެޑިކަލު ރިޕޯޓުގެ މައްޗަށް ބިނާކޮށް ކަމަށެވެ.

މިބަޔާނުގައި އައިޝަތު ރަޝީދާ އޭނާގެ ކުޑަ ދަރިފުޅާ ހަވާލާދީ ބުނެފައިވަނީ ދޮންބެ (އިބްރާހިމް މުހައްމަދު) އެކުޑަ އަންހެންކުއްޖާގެ (ކަނޑާލާފައި) ބޮއެ, އެކުޑަކުއްޖާގެ (ކަނޑާލާފައި) ވެސް ބޮއެ ހަދާފައިވާ ކަމަށެވެ. އަދި މިފަދަ އަމަލު ދޮންބެ (އިބްރާހިމް މުހައްމަދު) ވަރަށް ގިނައިން މިއަމަލު ހިންގާ ކަމަށާ މިވާހަކަ ނުދެއްކުމަށް އޭނާ ބުނާ ކަމަށެވެ.

އައިޝަތު ރަޝީދާގެ ބަޔާނުގައި އޭނާގެ ފިރިމީހާ އޭނާގެ ދަރިފުޅުގެ ހަރުވާޅާއި ޖަނގިޔާ ކަކުލުން ތިއަށް ބާލާފައިވާ ކަމަށް ވެސް ބުނެފައި ވެއެވެ.

ރަޝީދާ ބަޔާނުގައި ބުނެފައިވަނީ އޭނާ މީގެ ކުރިން ދެމީހުންނާއި އިނދެ 3 ކުދިން ލިބިފައިވާ ކަމަށާ އިބުރާހިމް މުހައްމަދު އެއަމަލު ހިންގިއިރު ތިންކުދިން ވެސް ތިބީ ކޮޓަރީގައި ނިދާފައި ކަމަށެވެ.