ހުއްދަ ނެތި ޓެލެވިޝަން މޯލްޑިވްސްގައި ދީނީ މައުޟޫއުތަކަށް ޓެލެވިޒަން މޯލްޑިވްސް މެދުވެރިކޮށް ވާހަކަ ނުދެއްކުމަށް ޑރ. އަފްރާޝީމް އަލީއަށް އަންގަވާފައި ވާނެ ކަމަށް އިސްލާމީ ކަންތައްތަކާ ބެހޭ އެންމެ މަތީ މަޖުލީހުން ބުނެފި އެވެ.

މަތީ މަޖުލީހުގެ ޑިރެކްޓަރ ޑރ.އަބުދުލް މަޖީދު އަބުދުލް ބާރީ ވިދާޅުވީ ޑރ.އަފްރާޝީމަށް އަދި ހުއްދަ ދޫކުރެވިފައި ނުވާ ކަމަށާއި އެހެން ނަމަވެސް ބައެއް ފަހަރަށް ޓީވީން ދީނީ މައުޟޫއަށް ވާހަކަދައްކާތީ ގެނެސްގެން އެގޮތަށް ހުއްދަ ނެތި ވާހަކަ ނުދެއްކުމަށް އަންގާފައިވާ ކަމަށެވެ.

” އަޅުގަނޑަށް އެނގިގެން މަޖުލީހުގެ ރައީސް ވަނީ ޑރ.އަފްރާޝީމް ގެންނަވާ އެގޮތަށް ޓީވީން ވާހަކަ ނުދެއްކުމަށް އަންގާފައި. އަޅުގަނޑަށް ހީވަނީ ޓީވީން އޭނާއަށް ސަޕޯޓް ދީގެން ކުރުވާ ކަމެއްހެން ތިއީ“ ޑރ. މަޖީދު ވިދާޅުވި އެވެ.

ޓީވީން ބުނީ ދީނީ ޕްރޮގްރާމެއް ކަމަށްވާ ”ވިސްނާލާއިރު“ ޑރ.އަފްރާޝީމް އަރުވަނީ ދީނީ މައުޟޫއުތަކަށް ޑިސްކަސް ކުރުމަށް ކަމަށެވެ. އަދި ޑރ.އަފްރާޝީމް އަތުގައި ޕީއެޗްޑީއެއް އޮތުމުން އެއީ ވާހަކަދެކެވޭ ފެންވަރުގެ އެއްޗެއް ކަމަށް ގަބޫލު ކުރާ ކަމަށެވެ.

” ޑރ.އަފްރާޝީމް އަރުވަނީ ދީނީ ފަތުވާއެއް ދިނުމަކަށް ނޫން. އަދި ދީނީ ނަސޭހަތެއް ދިނުމަކަށްވެސް ނޫން, އެއީ ޑިސްކަޝަން ސެޝަނެއް. އަޅުގަނޑުމެން ގަބޫލު ކުރާ ގޮތުގައި އޭނާއަށް ވާހަކަދެއްކުމުގެ ހުއްދަ އެބައޮތް“ ޓީވީއެމްގެ ސީއީއޯ އަލީ ޚާލިދު ވިދާޅުވި އެވެ.

ހުއްދަ ނެތި ބައެއް އާންމު ތަންތަނުގައި ދީނީ ނަސޭހަތްދޭ ކަމަށް ބުނެ އިބުރާހިމް ފަރީދު ހައްޔަރު ކުރުމަށް އިސްލާމީކަންތައްތަކާ ބެހޭ އެންމެ މަތީ މަޖިލީހުން ފުލުހުންނަށް އަންގާފައި ވެއެވެ.