ދާދިފަހުން ދިވެހި ރައްޔިރުންގެ ޕާޓީ)ޑީއާރްޕީ(ން ވަކިވެ ވަޑައިގެންނެވި ރައްޔިތުންގެ މަޖިލީހާއި ރައްޔިތުންގެ ޚާއްޞަ މަޖިލީހުގެ މެންބަރުން މޯލްޑިވިއަން ޑިމޮކްރެޓިކް ޕާޓީ )އެމްޑީޕީ( އާ ގުޅިގެން އިސްލާހީ މަސައްކަތް ކުރުމަށް ނިންމައިފި އެވެ.

މިކަން ނިންމާފައި ވަނީ ޑީއާރްޕީން ވަކިވެ ވަޑައިގެންނެވި މެމްބަރުން ނިސްބަތްވާ ޖަމިއްޔާއެއް ކަމަށްވާ ޕީޕަލްސް އެސޯސިއޭޝަންގެ ހެޑް އޮފީހުގައި ރޭ 10 ޖެހިއިރު ބޭއްވި ބައްދަލުވުމުގަ އެވެ.

މިބައްދަލުވުމުގައި އެމްޑީޕީގެ ޕާލަމެންޓްރީ ގްރޫޕުގެ ފަރާތުން ތިން މެމްބަރުން ބައިވެރިވެ ވަޑައިގެންނެވި އެވެ. މީގެ ތެރޭގައި ހިމެނެނީ ޕާލަމެންޓްރީ ގްރޫޕުގެ ރައީސް އަދި މާލޭ މެމްބަރު މުޙައްމަދު ޝިހާބާއި, ނާއިބް ރައީސް އަދި ތ. އަތޮޅު މެމްބަރު ހަސަން އަފީފާއި, ލ. އަތޮޅުމެމްބަރު ރީކޯ މޫސާމަނިކެވެ. ޕީޕަލްސް އެސޯސީއޭޝަންގެ ފަރާތުން ބައިވެރިވަޑައިގަތީ މިނިސްޓަރ އޮފް ހަޔަރ އެޑިއުކޭޝަން އެމްޕްލޯއީމަންޓް އެނޑް ޝޯޝަލް ސެކިއުރިޓީ ކަމުގެ މަގާމުން ދާދިފަހުން އިސްތިއުފާ ދެއްވި އަބްދުﷲ ޔާމީނާއި ސްޓޭޓް މިނިސްޓަރު ކަމުގެ މަގާމުން އިސްތިއުފާދެއްވި އަހުމަދު ނާޒިމާއި ގއ. އަތޮޅު މެމްބަރު އަބްދުﷲ ޖާބިރާއި ހއ. އަތޮޅު މެމްބަރު ޖައުފަރު އީސާގެ އިތުރުން ގދ. އަތޮޅު މެމްބަރު ޒާހިރު އާދަމެވެ.

ޕީޕަލްސް އެސޯސީއޭޝަންގެ އެއް މުއައްސިސެއް ކަމުގައިވާ ޖައުފަރު އީސާ މިއަދު ވިދާޅުވީ ދެ ފަރާތުގެ ދެމެދުގައި ވާހަކަތައް ދެކެވުނީ މަޖިލީހުގެ ތެރޭގައި ދެބައިމީހުން ގުޅިގެން ރައްޔިތުންނަށް ފައިދާހުރި ގޮތެއްގައި މަސައްކަތް ކުރުމަށް ބާރުއެޅުމުގެ ގޮތުން ކަމަށެވެ. މިގޮތުން ރައްޔިތުންނަށް ފައިދާ ހުރި ޑިމޮކްރެޓިކް ވެއްޓެއް ގާއިމް ކުރުމަށާއި, ހުށަހަޅާ ބިލްތަކަށް ވެސް ރައްޔިތުންނަށް ފައިދާ ހުރި ގޮތްތަކަކީ ކޮބާތޯ ބަލައި އެގޮތަކަށް ދެބައި މީހުން ގުޅިގެން މަސައްކަތް ކުރުމަށް ކަށެވެ.

” ވަކިމީހަކު އަންގާ ގޮތަކަށް ކަންތައް ކުރަން ހަދައިގެން މިހާރުވެސް ޚާއްޞަ މަޖިލިސް އޮތީ ޑެޑްލޮކް ވެފައި“ ޖައުފަރު ވިދާޅުވި އެވެ.

އޭނާ ވިދާޅުވީ ދެ ބައިމީހުންގެ މެދުގައި ދެކެވުނު ވާހަކަ ތަކުގެ ނަތީޖާ މާދަމާވެސް ޚާއްޞަ މަޖިލީހުން ފެންނާނެ ކަމަށެވެ.

” އައްބާސްގެ މައްޗަށް އިތުބާރު ނެތްކަމުގެ ވޯޓްގައި އަޅުގަނޑުމެން ވެސް ބައިވެރިވާނަން. އެކަން ކާމިޔާބު ކުރުމަށް މަސައްކަތް ވެސް ކުރާނަން“ ޖައުފަރު ވިދާޅުވި އެވެ.

ޖައުފަރު ވިދާޅުވީ އެ އެސޯސީއޭޝަނުގައި މިވަތު ވެސް މަޖިލީހުގެ ދިހަ މެމްބަރުން މަސައްކަތް ކުރައްވަމުން ގެންދަވާ ކަމަށެވެ.

މި ބައްދަލުވުމުގައި ބައިވެރިވި އެމްޑީޕީގެ ޕާލަމެންޓްރީ ގްރޫޕުގެ ރައީސް މުޙައްމަދު ޝިހާބުގެ ބަހެއް ނޫސް ޗާޕަށް ދިޔައިރު ވަނީ ލިބޭގޮތް ނުވެފަ އެވެ. މި ބައްދަލުވުމުގައި ބައިވެރިވި އެމްޑީޕީގެ ޕާލަމެންޓްރީ ގްރޫޕުގެ މެމްބަރު ރީކޯ މޫސާ މަނިކު ވިދާޅުވީ ރޭ ގެ ބައްދަލުވުން ކުރިއަށް ދިޔައީ ވަރަށް އެކުވެރި މާހައުލެއްގައި ކަމަށާއި އެ ބައްދަލުވުމަށްފަހު ގައުމު އިސްލާހުކުރުމަށް ކުރަމުންދާ މަސައްކަތަށް އިތުރު ހިތްވަރެއް ލިބިގެން ދިޔަ ކަމަށެވެ.

” އަޅުގަނޑުމެން މިތިބީ ހެޔޮއެދިގެން މަސައްކަތް ކުރުމަށް ކޮންމެ ބަޔަކު ގޮވާލިޔަސް އެކަމަށް އިޖާބަދީ މަސައްކަތް ކުރުމަށް ތައްޔާރަށް. އެމީހުން ) ޕީޕަލްސް އެސޯސޯއޭޝަން( ވެސް ތިބީ ޑީއާރުޕީން ކަންތައްތައް ކުރިއަށް ގެންދާ ގޮތުން ހިތް ހަމަނުޖެހިފައި. އެމީހުންނާ ގުޅިގެން އެކަށީގެންވާ މުހިއްމު, ރައްޔިތުންނަށް ފައިދާހުރި ކަންތައްތަކެއް މަޖިލީހުގެ ތެރޭގައި ކުރެވިދާނެ “ މޫސަ ވިދާޅުވި އެވެ. ރޭ ބޭއްވި ބައްދަލުވުމުގެ އިތުރު ތަފުޞީލެއް މޫސަ ނުދެއްވަ އެވެ.