ގދ. ފިޔޯރީ ބަނދަރު ހެދުމުގެ މަސައްކަތް މި އަހަރުގެ ބަޖެޓްގައި ހިމަނާފައި ނުވާތީ ރައްޔިތުން ނުކުމެ ވަނީ ރަށު އޮފީސް ބަންދުކޮށްފަ އެވެ. މޮޅަދޫ ސްކޫލުގައި ގްރޭޑް އަށެއް އުފައްދައި ނުދީގެން އެ ރަށުގެ ގިނަ ބަޔަކު ނުކުމެ ރަށު އޮފީސް ހިސޯރުކުރި އެވެ. އިނގުރައިދޫގައި އަޅާ އިންޖީނުގޭގެ ހަރަދުތައް ރައްޔިތުންނަށް ނާންގާ ކަމަށް ބުނެ އެ ރަށު ރައްޔިތުންގެ ތެރެއިން ބަޔަކު ނުކުމެ ރަށު އޮފީސްވެސް ހިސޯރުކުރި އެވެ. ތޮއްޑޫގައި ދަނޑުބިން ދޫކުރުން ލަސްވެގެން އެ ރަށު ރައްޔިތުންގެ ބަޔަކު ނުކުމެ ރަށު އޮފީހުން ބަންދުކުރި އެވެ. ކޮލަމާފުށީގައި ގާޒީއަކު ނެތިގެން ކައިވެނިތަކެއް ނުކުރެވިގެން ޒުވާނުން ނުކުމެ ކޯޓްގައި ބޮޑު ތަޅު އެޅުވި އެވެ. މަޑުވަރީ ރައްޔިތުން އުޅެންޖެހޭ ހާލުގެ ސަބަބުން ވަނީ މުޒާހަރާކޮށް ފައެވެ. މިއީ މިއަދުގެ ސަރުކާރު ބަދަލުވީ ފަހުން ވީހާ ކަންކަމެވެ.

ރާއްޖޭގެ އެކިހިސާބުތަކުން މުޒާހަރާތަކާއި އޮފީސް ބަންދުކުރުންތަކާއި ހިސޯރުކުރުންތައް ފެންނައިރު މިއީ އާއްކަމެއް ނޫނެނެވެ. މިކަން އިހުގެ ސަރުކާރު އޮތްއިރުވެސް ދިޔައީ ކުރަމުން ނެވެ. ނަމަވެސް ތަފާތަކީ މިހާރު އެކަން ކުރާ މީހުން ނެވެ. މިހާރު އެކަންކަން ކުރަމުން މިދަނީ އިހު ކުރިމީހުންނެއް ނޫނެވެ. އިހު އެކަން ކުރަމުން ދިޔައީ ކުރީގެ ސަރުކާރާ ދެކޮޅު މީހުން ނެވެ. މިހާރު އެކަން ކުރަމުން މިގެންދަނީ މިހާރުގެ ސަރުކާރާ ދެކޮޅު މީހުން ނެވެ.

ކޮންމެ ބަޔަކު މުޒާހަރާ ކުރިނަމަވެސް, ކޮންމެ ބަޔަކު ނުކުމެ އޮފީސް ބަންދުކުރި ނަމަވެސް އެކަން އެކުރަނީ ކޮންމެވެސް މަގުސަދެއްގަ އެވެ. ނޭނގެނީ ހަގީގީ މަގުސަދެވެ. ލޯމަތިން ފެންނަ މަގުސަދު ގޯހެއް ނޫނެވެ. މަޑުއްވަރީ ރައްޔިތުން އެހާލުގައި އުޅޭއިރު ސަރުކާރުގެ ސަމާލުކަމަށް އެކަން އަންނަން ވާނެ އެވެ. ތޮއްޑޫ ރައްޔިތުންގެ ދަނޑުވެރިކަން މަރުވިޔަ ދީގެން ނުވާނެ އެވެ. ގާޒީން ނެތިގެން ކައިވެނި ނުކުރެވޭ ހާލަތެއް އައިސްގެން ނުވާނެ އެވެ. ހައްތާވެސް މުހިންމު ކަންކަމެވެ. ކޮންމެހެން ކުރަންޖެހޭ ކަންކަމެވެ.

ގަބޫލު ކުރަންޖެހޭ ހަގީގަތަކީ މުޒާހަރާ ކުރުމާއި, އަޑުއުފުލުމާއި, ހިސޯރުކުރުމާއި, ތަންތަން ބަންދުކުރުމަކީ ރާއްޖެއަށް އައި ސިޔާސީ ބަދަލުގެ ތެރެއިން ރާއްޖެއަށް އުފަންވި ކަންކަން ކަމެވެ. މިކަމުގައި ނަގާ ކިޔާއުޅުނީ ނިމިދިޔަ ސަރުކާރާ ދެކޮޅު މީހުން ނެވެ. އެއީ އެކަން ވާނެވެސް ގޮތެވެ. މިއަދުވެސް ކަންވަނީ އެހެންނެވެ. މިއަދު މުޒާހަރާތަކުން ފެންނާނީ މިހާރު އޮތް ސަރުކާރާ ދެކޮޅު މީހުން ނެވެ. މާދަމާ ފެންނާނީ މާދަމާ އޮންނާނެ ސަރުކާރާ ދެކޮޅު މީހުން ނެވެ.

ސަރުކާރާ ދެކޮޅުވުމަކީ މައްސަލައެއް ނޫނެވެ. މައްސަލައަކީ މައްސަލައަށް ހައްލު ހޯދުމަށްވުރެ ބޮޑަށް އެހެން މައްސަލަތައް ކުރިއަށް ނެރޭތީ އެވެ. ކޮންމެ އެއްވުމެއް ސިޔާސީ ކުރަން ބަޔަކު މަސައްކަތް ކުރާތީ އެވެ. މުޒާހަރާ ކުރާ ކޮންމެ ބަޔަކު މުޒާހަރާ ކުރަނީ ސަރުކާރާ ދެކޮޅުވުމުންނެއް ނޫނެވެ. އެކަން ކުރަނީ ކޮންމެވެސް ކަމަކާ ދެކޮޅު ވުމުން ނެވެ.

މިސާލަކަށް ރިސޯޓްމުވައްޒަފުންގެ ވަޒީފާގެ ހައްގުތަކަށް ބަލަމާ ހިނގާށެވެ. އެހައްގުތައް ނުލިބިގެން ރިސޯޓްތަކުގެ މުވައްޒަފުން ބައެއް ރިސޯޓްތަކުގައި ހަޅުތާލު ކުރިއެވެ. އެއީ ސިޔާސީ ކަމެއް ނޫނެވެ. ސިޔާސީ ކުލަޖައްސަންވީ ކަމެއްވެސް ނޫނެވެ. އެއަށްވުރެ ބޮޑަށް އެއީ އިންސާނީ ހައްގުތަކާ ގުޅިފައިވާ ކަމެކެވެ. ނަމަވެސް ފެނިގެން ދިޔައީ އެކަމުގައިވެސް ސިޔާސީ ކުލަޖެހިގެން ދިޔަތަނެވެ. މިއީ ހިތާމަކުރަންޖެހޭ ކަމެކެވެ.

ކޮންމެ ކަމެއް ސިޔާސީ ކަމަކަށް ހެދުން ރަނގަޅެއް ނުވާނެ އެވެ. އޭރުން އެކަމުގެ މަގުސަދު ގެއްލެއެވެ. މިހާރުވެސް މުޒާހަރާ ކުރަންވީ އެވެ. އަޑު އުފުލަންވީ އެވެ. ހައްގުތައް ނުލިބޭނަމަ އެހައްގު ހޯދުމަކީ ތިމާގެ އަމިއްލަ ކަމެކެވެ. ނަމަވެސް އެހައްގު ހޯދުމަށް ފައިނަގާއިރު އަނެކާގެ ހައްގު ގެއްލިގެންދާނަމަ އެއީ ތިމާގެ ހައްގު ފަދައިން އަނެކާގެ ހައްގުވެސް ގެއްލޭނެ ކަމެއްކަން ދަންނާށެވެ. އޮފީސް ބަންދުކުރިނަމަވެސް ކުރަންވާނީ އެއުސޫލުން ނެވެ. މުޒާހަރާ ކުރުމުން ހިތްހަމަ ނުޖެހޭ މީހުން ތިބޭނެ އެވެ. އިއްޔެވެސް އެފަދަ މީހުން ތިއްބެވެ. މުޒާހަރާތަކާ ދެކޮޅު މީހުން ތިއްބެވެ. ނަމަވެސް އެމީހުން ތިބީ މަޑުން ނެވެ. މިއަދުވެސް މުޒާހަރާ ކުރެއެވެ. އަޑުއުފުލަ އެވެ. ނަމަވެސް މިއަދު މުޒާހަރާ ކުރާ މީހުންނާ ދެކޮޅަށް މުޒާހަރާ ކުރާމީހުންވެސް ފެންނަމުން އެބަދެއެވެ.

މިއީ ނުރައްކާތެރި ކަމެކެވެ. ހަމަނުޖެހުން ހިނގުމަށް ހުޅުވޭ އެންމެ ފަސޭހަ މަގަކީ މިދެންނެވި މަގެވެ. ކަމަކާ ދެކޮޅަށް އަޑުއުފުލާ މީހުންނާ ދެކޮޅަށް ހަމައެތަނުގައި ތިބެ އަޑުއުފުލުމުގެ ފުރުސަތު ދިނުމަކީ ރީތި ޑިމޮކްރަސީ އެއްނޫނެވެ. އެއީ ހުތުރު ޑިމޮކްރަސީ އެވެ. ބަޔަކު ނުކުމެ އަޑުއުފުލަނީ އެހައްގު ހޯދުމަށެވެ. އެހައްގު ހޯދިޔަ ނުދިނުމށް އަޑުއުފުލުމަކީ ހުތުރުކަން ބޮޑު ކަމެކެވެ. އެއީ މައްސަލަ އެކެވެ. އެހެން ވިޔަދީގެން ނުވާނެ އެވެ. އޭރުން އިހު ދެއްކި ނަމޫނާވެސް އެ ގެއްލުނީ އެވެ.