އެކުވެރިކަމުގެ މެޗެއްގައި ރޭ އިޓަލީ އާއި ގްރީސް ބައްދަލުކުރި މެޗު 1-1 އިން އެއްވަރުވެއްޖެއެވެ.

ގްރީސްގައި ކުޅެވުނު މިމެޗުގެ ކުރީކޮޅު ރަށު ޓީމުން ލީޑު ނަގާފައިވަނިކޮށް މެހެމާނުންނަށް އެއްވަރުކޮށްދިނީ ޑިރޮސީގެ ހިލޭޖެހުމަކުން ލުކަޓޯނީއެވެ. ހުރިހާ ގޮތަކުންވެސް ރޭ އިޓަލީ މޮޅަށް ކުޅުނު ނަމަވެސް ގްރީސްގެ ގޯލް ކީޕަރުގެ ހުޝިޔާރުކަމުން އެޓީމަށް އިތުރު ގޯލެއް ނުޖެހުނީއެވެ.

ރޭގެ މެޗަކީ ލިއްޕީ އިޓަލީގެ ކޯޗުކަމުގައި ބަލިނުވެ ހަމަކުރި 31 ވަނަ މެޗެވެ. ގައުމީ ޓީމާއި އެކު މިހާ ހިސާބަށް ދެވިފައިވަނީ ހަމަ އެންމެ ދެ ކޯޗުންނަށެވެ. އެއީ އާޖެންޓީނާގެ ކުރީގެ ކޯޗު އަލްފިއޯ ބެސިއްލޭ އަށާއި ސްޕޭނުގެ ކުރީގެ ކޯޗު ކްލެމެންޓޭއަށެވެ.

"މިކަމާއި މެދު ވިސްނޭތާ ދުވަސްކޮޅެއްވެއްޖެ، އެކަމަކު މީގައި އެންމެ ބޮޑު ހިތްހަމަ ޖެހުމެއް ލިބުނީ ވޯލްޑް ކަޕު ލިބުމުން" އުފާވެފައިހުރި ލިއްޕީ ބުންޏެވެ. "ކުރިއަށް ހުރި މެޗުތަކާއި މެދުވެސް އަހަރެން ދެކެނީ އުއްމީދާއެކު"

ލިއްޕީ ބުނީ އިޓަލީ ޓީމުގެ ފުރަތަމަ އެގާރައިހައި ރޭ ހިމެނުނު ގުއިސެއްޕެ ރޮސީ އަކީ މުސްތަގުބަލުގައި ވަރަށް މޮޅު ކުޅުންތެރިއަކަށް ވާނެ ފޯވަޑެއް ކަމަށެވެ.—އޭޕީ