ތާޒާ ކުދި ފެންފުޅީގައި ސޮލީބެއް ފާޑުގެ ބައްޓަމެއް ހުންނަ ހުރުމަކީ ފުޅި އުފައްދާ މެޝިނަށް ލިބުނު ގެއްލުމަކާ ގުޅިގެން ހުންނަ ހުރުމެއް ކަމަށް ތާޒާ ފެން އުފައްދާ އައިލެންޑް ބެވަރޭޖަސް މޯލްޑިވްސް ޕްރައިވެޓް ލިމިޓެޑުން ބުނެފިއެވެ.

ތާޒާ ކުދި ފެންފުޅީގައި ސޮލީބެއް ހުންނަ ކަމަށް މާލެތެރޭގައި ދެކެވޭ ވާހަކަތަކުގެ ސަބަބުން ޖަޒީރާއިން ބެލިބެލުމުގައި ތާޒާ ކުދި ފުޅީގެ ފުލުން ފެށިގެން އެއްއިންޗިއާއި ހަމައިން މައްޗަށް އިންޗިއެއްވަރުގެ ދިގު ކުޑަކުޑަ އުފުލުމެއް(ބަނޑިއެއް ގޮތަށް) ފުޅީގެ ބޭރަށްވާގޮތަށް ހުރިކަން ފާހަގަ ކުރެވުނެވެ. އަދި އެއުފުލުމުގެ މެދު ދިމާވަނީ ފުޅީގައި އެޅިފައިވާ އަޑި ޑިޒައިނާއަށް ކަމުން ހުރަސް ރޮނގެއް އުފެދި ސޮލީބެއްގެ ސިފަ ކަހަލަ ގޮތެއް ފެނެއެވެ.

މިކަމާ ގުޅޭގޮތުން ޖަޒީރާއިން ދެންނެވި ސުވާލަކަށް ޖަވާބު ދެއްވަމުން އައިލެންޑް ބެވަރޭޖަސް މޯލްޑިވްސް ޕްރައިވެޓް ލިމިޓެޑްގެ އެސިސްޓެންޓް މާކެޓިންގ މެނޭޖަރ ހަސަން މުގްނީ ވިދާޅުވީ އެފަދަ ބައްޓަމެއް ހުރި ފެންފުޅިތަކެއްގެ ބެޗެއް ބޭރުވެއްޖެ ކަމަށާއި އެއީ މެޝިނަށް ލިބުނު ގެއްލުމަކުން ފުޅީގެ ބައްޓަމަށް އައި ބަދަލެއް ކަމަށެވެ.

”މެޝިންގައި ހިމެނޭ ފުޅީގެ ތައްގަނޑުގައި ހިމެނޭ ޝާފްޓެއް ބިންދައިގެން ގޮސް ތައްގަނޑުތެރެއަށް ވެއްޓުނީ. އެކަމާ ގުޅިގެން ތައްގަނޑަށް ލިބުނު ގެއްލުމަކުން ދިމާވި ކަމެއް އެއީ“ މުގްނީ ވިދާޅުވިއެވެ.

މުގްނީ ވިދާޅުވީ އެގޮތަށް ދިޔައީ ގާތްގަނޑަކަށް އެއްބެޗް ކަމަށާއި މިހާރު ތައްގަނޑުން ބައެއް ގާނައިގެން ސޮލީބުގެ ބައްޓަމަށް ހުންނަ ގޮތްގަނޑު ކަނޑުވާލާފައިވާނެއެވެ. ނަމަވެސް އަދިވެސް ފުޅީގައި ކުރިން ނުހުންނަ އުފުލިފައިވާ ތަންކޮޅެއް ހުންނާނެ ކަމަށެވެ.

”މެޝިން ނެތް ރާއްޖެއަކުން ހެދޭކަށް. އެބައި ހެދުމުގެ މަސައްކަތް މިހާރު ކުރިއަށް އެބަގެންދަން. އެކަމަކު ތައްގަނޑުން ބައެއް ގާނާލައިގެން މިހާރު ސޮލީބުގެ ބައްޓަން ހުންނާނީ ކަނޑުވާލާފައި. މިހާރުގެ ފެންފުޅިތަކުގައި ކުޑަކޮށް އެއުފުލުން ހުއްޓަސް ސޮލީބުގެ ބައްޓަމެއް ނުހުންނާނެ.“ މުގްނީ ވިދާޅުވިއެވެ.

މިވާހަކަ މާލެތެރޭގައި ފެތުރެންފެށީ އެއީ ނޮވެމްބަރ އެގާރައިން ފެށިގެން ހިނގާ ކަމެއްގެ ގޮތުގައެވެ. އަދި އެއީ މިހާރުގެ ރައީސުލްޖުމްހޫރިއްޔާ މުހައްމަދު ނަޝީދު ހުވާކުރެއްވި ފަހުންވީ ކަމެއް ކަމަށާއި މިވާހަކަދައްކާ ބައެއް މީހުން ނަޝީދާވެސް މިވާހަކައާއި ގުޅުވާލައެވެ.

މުގްނީ ވިދާޅުވީ އެހެން ދިމާވި ތާރީޚެއް ކަނޑައެޅިގެން ދަންނަވަން ދަތިކަމަށާއި ހަމަގައިމުވެސް އެއީ އެނގިގެންވީކަމެއްނޫން ކަމަށާއި އެއީ އެކްސިޑެންޓެއް ކަމަށެވެ.

އައިލެންޑް ބެވަރޭޖަސް މޯލްޑިވްސް ޕްރައިވެޓް ލިމިޓެޑަކީ ސަރުކާރުގެ ފެންކުންފުންޏާއި ޗަމްޕާ ކުންފުންޏާ ގުޅިގެން އުފައްދާފައިވާ ކުންފުންޏެކެވެ. މި ކުންފުނީގެ ހިއްސާގެ ބޮޑުބައި އޮންނަނީ ސަރުކާރަށެވެ.