ބޮޑު ބާޣީގެ ގޮތުގައާއި ބޮޑު ޣާޒީގެ ގޮތުގައި ރާއްޖޭގައި އެންމެފަހުން ވެރިކަން ކުރެއްވި ރައީސް މައުމޫނުގެ ސަރުކާރުގެ އިސް ބޭފުޅުން ވިދާޅުވަމުން ގެންދަވާ ބޭފުޅަކީ މަޝްހޫރު ވިޔަފާރި ވެރިޔާ ޤާސިމް އިބްރާހީމެވެ.

ފުރަތަމަ ބާރަ ތޭރައަށްފަހު ހައްޔަރުކޮށް އެތައް ބަޔަކަށް ދެމުންދިޔަ އެހީތައް ހުއްޓުވާލި ޤާސިމަށް އެދުވަސްވަރު ބޮޑު ބާޣީގެ ގޮތުގައި އާޑު ފުރައްސާރަ ކުރައްވަމުން އައި މައުމޫނު ސަރުކާރުގެ އިސްވެރިން ފަހުން ޤާސިމަށް ހުޝާމަދުކުރައްވަމުން ގެންދެވީ ޣާޒީއެއްގެ ލަގަބައިގެންނެވެ. މުޅި މާލިއްޔަތު ޤާސިމާ ހަވާލުކޮށް މައުމޫނު ޒައީމަކަށް ހުންނެވި ޕާޓީގެ ނައިބު ޒައީމުކަންވެސް ދެއްވީއެވެ

ޤާނޫން އަސާސީ އިސްލާހު ކުރުމަށް އެއްކުރެއްވި ޚާއްޞަ މަޖިލީހުގެ ރައީސްކަން ޑީއާރުޕީގެ ސަބަބުން ޤާސިމަށް ފުރަތަމަ ލިބިވަޑައި ނުގަތްނަމަވެސް ފަހުން އެމަޖިލީހުގެ ރައީސްކަން ޤާސިމަށް ހޯއްދަވައިދެއްވީ ޑީއާރުޕީގެ ފުރިހަމަ ބާރުގައެވެ.

މަޖިލީހުގެ ރައީސްކަން ލިބުމާއެކު ޤާސިމް ހަށިފޮޅާލިއެވެ. ދެބަސްވުމާއި ކޯޅުމާއި އަރާރުމާއި ނިޒާމީ ނުކުތާގެ ސަބަބުން ފިރުކެމުން ކުރިއަށް އައި ރައްޔިތުންގެ ޚާއްޞަ މަޖިލިސް ގާސިމުގެ ރިޔާސަތުގައި ދުއްވައިގަތެވެ.

ޤާނޫން އަސާސީ އިސްލާހުވެ ތަސްދީގް ވުމާއެކު ޤާސިމް ކޮޅު ބަދަލުކޮށްލެއްވިއެވެ. މައުމޫނުގެ ސަރުކާރާއި ޑީއާރުޕީވެސް ދޫކޮށް ކުރިންވެސް ހުންނެވި އިދިކޮޅު ބަޔަށް ވަޑައިގެން ޕާޓީއަކާ ގުޅިވަޑައިގަތެވެ.

ޖުމްހޫރީ ޕާޓީއާ ޤާސިމާ ދެންވެސް ޑީއާރުޕީގައި ޤާސިމާއެކު އުޅުއްވި ބައެއް ވިޔަފާރިވެރިން ގުޅިވަޑައިގަތުމުން އެންމެ ބޮޑަށް ދެކެވުނު ވާހަކައަކީ އަދި ދެކެވޭ ވާހަކައަކީ ”ވިޔަފާރި ކުންފުނި“ ވިޔަފާރިވެރިންގެ ޕާޓީ“ ”ޤައުމުގެ ހަލާކު“ ”އަމިއްލަ ވިޔަފާރި ކުރިއަރުވަން ހެދި ޕާޓީ“ ގެ ލަގަބު އެޕާޓީއަށް ލިބެން ފެށިއެވެ.

މިވާހަކަ އެންމެ ހަރު އަޑުން ގޮވަން ފެށީ އެމެންބަރުން އެޕާޓީގައި ތިއްބެވިއިރު އެޕާޓީއަކީ ވިޔަފާރި ކުންފުންޏަކަށް ނުވި ޑީއާރުޕީންނެވެ.

ޑީއާރުޕީގެ އިތުރުން އާއްމުންގެ ތެރެއިންވެސް އަދި އިދިކޮޅު އެހެން ޕާޓީތަކުންވެސް މިވާހަކަ ދައްކަމުން ދިޔައީ ހަމަ އެގޮތަށެވެ.

ބައެއް މީހުން ބުނަމުން ދިޔައީ ދެން އެއްކަލަ ނުނެގިއޮތް ޓެކްސެއްވެސް ނުނެގޭނެ ކަމަށެވެ. ދެން ވެގެން ދާނީ މުއްސަނދިން އިތުރަށް މުއްސަނދިވެ ފަގީރުން އިތުރަށް ފަގީރުވެގެން ކަމަށެވެ.

ޤާސިމްގެ ކެމްޕޭން ފެށިރޭ ހެދިގޮނޑުދޮށުގައި އެތައް ބަޔަކު ހެކިކޮށް ވަރަށްގިނަ ވައުދުތަކެއް ވެވަޑައިގެންނެވިއެވެ. އޭނާގެ ސަރުކާރެއްގައި ކޮންމެހެންވެސް ކޮށްދެއްވާނެ ކަމަށް ވިދާޅުވެ ޑެޑްލައިން ތަކަކާ އެކުގައެވެ. އެކަންކަން ކުރުމަށް ބޭނުންވާ ފައިސާ ހޯދާނެގޮތަކީ ކޮބައިކަން ހާމަކޮށްދިނުމަށް ޤާސިމް ވިދާޅު ކަންތައްތަކަކީ ވިޔަފާރި ކުންފުންޏެއް ކަމާއި އަމިއްލަ ވިޔަފާރި ކުރިއަރުވަން އުޅޭ ބައެއްކަމަށް ބުނަމުންއައި މީހުންގެ އަނގަމަތީގައި ތަފާލެއް ޖެހުވި ފަދަ ކަމަކަށެވެ.

ރާއްޖޭގެ އެންމެބޮޑު މަހުޖަނުކަމަށް ބުނަމުން އަންނަ ޤާސިމް ވިދާޅުވީ މިކަންތައްތައް ކުރުމަށް ބޭނުންވާ ފައިސާ ހޯއްދަވާނެއެއްގޮތަކީ 15 ޕަސެންޓުގެ ކޯޕަރޭޓް ޓެކްސްއެއް ނަގައިގެންނެވެ. އެކަން ސަރުކާރާ ހަވާލުވާތާ އެއްމަސްދުވަހުގެ ތެރޭގައި މަޖިލީހަށް ހުށަހަޅުއްވާނެ ކަމެވެ. އަދި އެޤާނޫން ފާސްވާތާ އެއްމަސްދުވަހުގެ ތެރޭގައި އެއާމްދަނީ ސަރުކާރަށް ވެއްދޭނެގޮތް ހައްދަވާނެ ކަމަށެވެ.

ތިރީސް އަހަރުވާން ދިޔަ މައުމޫނުގެ ސަރުކާރަށް އަދިއަދަށްވެސް ނުވެއޮތް ޓެކްސް ނަގަން ޤާސިމް ނިންމެވީއެވެ. ވިޔަފާރިވެރިއަކަށް ހުންނަވާ ގިނައަދަދެއްގެ ވިޔަފާރިވެރިން ތިއްބެވި ޕާޓީއިންނެވެ.

ދެވަނަ ކަމަކަށްވެސް ޤާސިމްވިދާޅުވީ އާދައިގެ ކަމެއް ނޫނެވެ. އެންމެގިނަ ރިސޯޓުގެންގުޅުއްވާ އެއް ވިޔަފާރިވެރިޔާ ވިދާޅުވީ ތިންމަސްދުވަހުގެތެރޭގައި ޖީއެސްޓީ ޓެކްސެއް ޓުއަރިޒަމްގެ ދާއިރާއިން ނަގާނެ ކަމަށާއި އެއީ ރިސޯޓްތަކުން ލިބޭ ފައިދާގެ މައްޗަށް ބިނާކޮށް ރިސޯޓްތަކުން ނެގޭ ޓެކްސެއް ކަމަށެވެ. ކުރިން ސަރުކާރަށް ލިބޭ 8 ޑޮލަރުގެ ބަދަލުގައި ބޮޑު އެއްޗެއް ލިބޭނޭގޮތް ހައްދަވާނެކަމަށް ވިދާޅުވި ވިދާޅުވުމަކީވެސް ކުރިން ހީކުރި ގޮތާ ޚިލާފް ކަމެކެވެ.

ތިންވަނަ ކަމަކަށް ޤާސިމް ވިދާޅުވީ ބޮޑު މަސައްކަތެއް ކުރައްވާނެ ވާހަކައެވެ. ބޮޑު އިންޓަރެސްޓުގައި ބޮޑެތި ލޯނުތައް ނެގުމުގެ ބަދަލުގައެވެ.

ޤާސިމް ވިދާޅުވީ އުތުރުގެ ސަރަހައްދުގައި ތެޔޮ ހުރިކަމުގެ މައުލޫމާތެއް ލިބިފައިވާ ކަމަށާއި ކަމުގެ ތަޖުރިބާކާރުން ލައްވާ އެކަން ފުރަތަމަ ދުވަހުން ފެށިގެން ބަލައި, ހުރިނަމަ 3 އަހަރުތެރޭގައި ތެޔޮ ނެގޭތޯ ބައްލަވާނެ ކަމަށެވެ.

ކުރިން އިވެމުންދިޔަ އަޑުތަކާ ޚިލާފަށް މިފަދަ ކަންތައްތަކެއް ޤާސިމް ކުރައްވާނެކަމަށް ވިދާޅުވުމުން އުފެދޭ ސުވާލަކީ ޤާސިމް މިފަހަރު މިކުރެއްވީ އަނެއްކާ ކޮންކަމެއް ބާވައެވެ؟ ނޫނީ މިހައްދަވަނީ ކިހިނެތް ބާވައެވެ؟

މިއީ ޤާސިމްގެ އަމިއްލަ އެދުމަކަށް ދައްކާލި ވާހަކައެއް ބާވައެވެ. ނޫންނަމަ ޤާސިމް ވިދާޅުވާ އަމިއްލަ އެދުމައިގެން ދެއްކެވި ވާހަކައެއް ބާވައެވެ؟

ޤާސިމް ވިދާޅުވީ އޭނާ ރައީސްކަމަށް ކުރިމަތިލައްވަނީ ވަރަށްބޮޑު އަމިއްލަ އެދުމަކައިގެންނެވެ.

”އަޅުގަނޑުގެ ވަރަށް ބޮޑު އަމިއްލަ އެދުމެއް އެބައޮތް. އެއެދުމަކީ ދިވެހިރައްޔިތުން އެދޭ ބަދަލުތައް ދިވެހިރައްޔިތުންނަށް ގެނެސްދިނުމާއި ތިޔަބޭފުޅުން އެދިވަޑައިގަންނަވަމުންދާ ތަފާތު ކަންތައްތައް ހާސިލްކޮށްދިނުމާއި އަދި ރާއްޖޭގެ ރައްޔިތުންގެ ތެރެއިން ކަންތައްތަކަށް ދަތިވެފައިވާ, އުނދަގޫވެފައިވާ މީހުންގެ ދަތިތައް ފިލުވައިދިނުން. މިކަމަށް ބޭނުންނުވާ ދިވެހިރައްޔިތަކު ހުރިކަމަކަށް އަޅުގަނޑު ނުދެކެން. އެއީ އަޅުގަނޑުގެ އަމިއްލަ އެދުމަކީ“ ޤާސިމް ވިދާޅުވިއެވެ.

އެނގިދާނެތާއެވެ. ދަޅަދައްކައިގެންވެސް ދެނެއް ތިރީސް އަހަރު ވެރިކަމުގައި ދެމިހުރުމުގެ ފުރުސަތެއް ދިވެހިރައްޔިތުންނެއް ނުދޭނެއެވެ.