ހެޔޮލަފާ ގެވެހި އަންބެއްގެ ސިފަތައް ކޮޅުން ނުލާހާ ގިނައެވެ. މީގެތެރެއިން އެންމެ މުހިއްމު އެއް ކަމަކީ ގޭތެރޭގައި ކުރެވޭ ޚަރަދުތަކުން އިސްރާފް މަދުކޮށް އިޤްތިޞާދުކުރުމެވެ. އާދައިގެ އަދި މެދު ފަންތީގެ އާއިލާތަކުގައި ، އިޤްތިޞާދުކުރަން ދަންނަ އަނބިންގެ އިއްޒަތާއި އަގު އުފުލިގެންވެއެވެ. އެފަދަ އަނބިންނަށް ކުޑައެހީތެރިކަމެއް ފޯރުވައި ދިނުމުގެ ގޮތުން ، އިޤްތިޞާދުކުރުމުގައި ބޭނުންކުރެވިދާނެ ބައެއްގޮތްތައް ތިރީގައި އެވަނީއެވެ.

• އެއްވެސް އެއްޗެއް ގަތުމުގެ ކުރިން އަމިއްލަ ނަފްސާ ދެ ފަހަރު ސުވާލު ކުރާށެވެ. “ މިއީ ކޮންމެހެން ގަންނަން ބޭނުން އެއްޗެއް ހެއްޔެވެ؟”

• ބާޒާރުކުރުމުގައި ގިނަ ބާވަތްތައް އެއް ތަނަކުން ލިބޭ އަދި ޑިސްކައުންޓް ދޭ ފިހާރަތަކުން ވިޔަފާރި ކުރާށެވެ.

• ގޭގައި ބޭނުން ކުރާ ދަޅުފަދަ ތަކެތި ހަދާފައި ހުންނަ އެލްމިނިއަމް އަދި ދަގަޑަކީ ވިކޭ އެއްޗެއްސެވެ. މިފަދަ ތަކެތި އެއްކުރުމަށްފަހު ވިއްކާލާށެވެ.

• ވީވަރަކުން ގޭގައި އާއްމުކޮށް ބޭނުންކުރާ މިރުސް އަދި ކޮޕީފަތް ފަދަ ތަކެތި އަމިއްލައަށް ހައްދާށެވެ. މިއީ ވަރަށް ފަސޭހައިން ހެދޭ ބާވަތްތަކެވެ.

• ގޭތެރެ ޒީނަތްތެރިކުރުމަށް އަގު ބޮޑެތި ގަސް ގަތުމުގެ ބަދަލުގައި ރައްޓެއްސެއްގެ އަތުން ގޮފިކޮޅެއް ހޯދައިގެން ރޯކުރާށެވެ.

• ގޭތެރަށް ބޭނުންވާ ސާމާނު ގަތުމުގައި ފިހާރަތަކުގައި ސޭލް އަޅުވާ ދުވަސްތައް ބަލާށެވެ. އަދި އެތަންތަނުން ތަކެތި ގަންނާށެވެ.

• ގޭތެރޭގައި ކޮންމެދުވަހަކު ބޭނުންކުރާ ދަޅުމަސް، ޓޮމާޓޯ ޕޭސްޓް، ކުދިވެރިންގެ އިންޓަރވަލް އަދި ނޫޑުލް ފަދަ ތަކެތި ގަނޑުކޮށް ގަންނާށެވެ. އަގު ހެޔޮވާނެއެވެ.

• ކޮންމެ މަހަކު އަންނަ ކަރަންޓް، ފެން، ފޯނު، ކޭބަލް ޓީވީ އަދި އިންޓަރނެޓް ފަދަ ބިލްތައް ރަގަޅަށް ޗެކް ކުރާށެވެ. ބޮޑެތި ކުންފުނިތަކުން ހަދާ ބިލްތަކުގައި ބައެއްފަހަރު މައްސަލަހުރެއެވެ.

• ޖޫރިމަނާ އެރުމުގެ ކުރިން ބިލްތަކަށް ފައިސާ ދައްކާށެވެ.

• އިންޝުއަރެންސް ޕޮލިސީއެއް ނަގާފައި ވާނަމަ ތިން މަހުން ނުވަތަ ހަ މަހުން ޕްރިމިއަމް ދެއްކުމުގެ ބަދަލުގައި މުޅިއަހަރަށް އެއްފަހަރާ ދައްކާށެވެ.

• ލޯނެއް ނަގާނަމަ އެންމެ އިންޓްރެސްޓް ކުޑަކޮށް ދޫކުރާ ފަރާތަކުން ނަގާށެވެ. އަދި ވީ އެންމެ ކުރުމުއްދަތަކަށް ނަގާށެވެ.

• ޕާޓީ ބާއްވާނަމަ ޑިސްޕޯސަބަލް ތަށިފަދަ ތަކެތި ގަތުމުގެ ބަދަލުގައި އާދައިގެ ތަށި، ސަމުސާ އަދި ނެޕްކިން ހޯދާށެވެ. ގަތުމުގެ ބަދަލުގައި ތިމާގެ މީހެއްގެ ނުވަތަ ރައްޓެއްސެއްގެ ގެއިން ގެންނާށެވެ.

• އަގު ބޮޑެތި ފޭސް ޓިޝޫ ގަތުމުގެ ބަދަލުގައި ދޮވެގެން ގިނަ ފަހަރު ބޭނުން ކުރެވޭ ރުމާ ގެންގުޅޭށެވެ.

• ބާޒާރަށް ނޫންގޮތަކަށް ގެއިން ބޭރަށް ދާނަމަ ފައިސާއަދި ކޭޝްކާޑު ގޭގައި ބަހައްޓާފައި ދާށެވެ. ނޫނީ ވަރަށް ފަސޭހައިން ފިހާރައަށް ވަދެ ކޮންމެސް އެއްޗެއް ގަނެވިދާނެއެވެ.

• ގޭތެރޭގެ އެއްވެސް ކަމެއް ކުރުމަށްޓަކައި މީހަކު ފައިސާ ދީފައި ގެނައުމުގެ ބަދަލުގައި އަމިއްލައަށް އެކަން ކުރުމަށް ވިސްނާށެވެ.

• އަމިއްލައަށް ނުކުރެވޭފަދަ ބޮޑެތި މަސައްކަތް ކުރުމަށް ބޭނުން ވާނަމަ ދެތިން ފަރާތަކުން އަގު ހޯދުމަށްފަހު އެންމެ ކުޑައަގެއް ހުށައަޅާފަރާތަކަށް މަސައްކަތް ހަވާލުކުރާށެވެ.

• ގޭތެރެއާއި ގޭގައި ގެންގުޅޭ ކަރަންޓް ސާމާނު އަދި ވެހިކަލް ކޮންމެ ދުވަހަކު ސާފުކޮށް ކުދި މަރާމާތުތައް ކުރާށެވެ. ބޮޑެތި މަރާމާތުކުރަން ޖެހޭލެއް މަދުވާނެއެވެ.

• ގެއާއި ވެހިކަލް އަބަދުވެސް ރަގަޅު ހާލަތެއްގައި ބަހައްޓާށެވެ. ވިއްކާލަން ނުވަތަ ކުއްޔަށް ދޭން ބޭނުންވާއިރު ބޮޑު އަގުގައި ދެވޭނެއެވެ.

• ގޭތެރެ ކުލަލުން އަދި ކުދި މަރާމާތު އަމިއްލައަށް ކުރާށެވެ.

• ގޭކުދިންގެ ބޯކޮށުން، އެކުދިންގެ ހެދުން ފެހުން، ދޮރުފޮތި އަދި ބެޑްޝީޓް ފެހުން ފަދަ ކަންތައް އަމިއްލައަށް ކުރާށެވެ.

• ރައްޓެއްސެއް ނުވަތަ ގޭ ކުއްޖެއްގެ އުފަން ދުވަސް ފަދަ މުނާސަބަތުތަކަށް ބޭރުން ކޭކު ގަތުމުގެ ބަދަލުގައި އަމިއްލައަށް ގޭގައި ތައްޔާރުކުރާށެވެ.

• ކަރަންޓް އަދި ފެން ބޭނުން ކުރުމުގައި ވީވަރަކުން އިސްރާފް މަދުކުރާށެވެ. އަދި ގޭގައި އުޅޭ އެހެންމީހުންނަށް މިކަން ވިސްނާދީ މި އާދަ ހަރުލައްވާށެވެ.

• ޕްލާސްޓިކް ދަޅުފަދަ ތަކެތި އެއްލާނުލާ ބަހައްޓާށެވެ. ތަކެތި ރައްކާކުރުމަށް ބޭނުން ކުރާށެވެ.

• އެލްމިނިއަމް ފޮއިލް އަދި ޕްލާސްޓިކް ކޮތަޅު ދޮވެގެން އަލުން ބޭނުން ކުރާށެވެ.

• ގެއެއް ނުވަތަ އެޕާޓްމަންޓެއް ހޯދުމުގައި އާ އަދި އަގުބޮޑުތަނެއް ހޯދުމުގެ ބަދަލުގައި ބާ އަދި އަގު ހެޔޮތަނެއް ހޯދުމަށްފަހު އަމިއްލައަށް ޒީނަތްތެރިކުރާށެވެ.

• ސައިބޯނި ކުޑަވުމުން ނައިލޯނު ދާކޮޅަކަށް ލައިގެން ބޭނުން ކުރާށެވެ. ގައި އުގުޅަންވެސް ފަސޭހަވާނެއެވެ.

• ގިނައިން ޝޭމްޕޫ ލުމުގެ ބަދަލުގައި ޝެމްޕޫ ފެންފޮދެއްގައި ގިރާލާށެވެ. އަވަހަށް އަދި ފަސޭހައިން ފޮނުއަރާނެއެވެ.

• ނޫސްކަރުދާސް އުކާނުލާށެވެ. އެއްޗެތި ތެލުލާފައި އަޅާތަށީގެ ތެރޭގައި އަޅާށެވެ. ތެޔޮތައް ފޭދުމަށް އެހީތެރވެދޭނެއެވެ.

• ކޮންމެހެން ބޭނުން ވެގެންނޫނީ ފޯނު ބޭނުން ނުކުރާށެވެ.

• އެއްވެސް އިތުރު ގޮތެއް ނެތިގެން ނޫނީ ދުއްވާއެއްޗަކަށް ނާރާށެވެ. ޚާއްސަކޮށް ޓެކްސީގެ ބޭނުން ކުރުމުގައި ވަރަށް ބޮޑަށް ވިސްނާށެވެ.