އަފްޣާނިސްތާނުގައި ހަރަކާތްތެރިވާ އެމެރިކާ ސިފައިން މަންގަހާރު ޕްރޮވިންސްގައި ހުރި ގެއަކަށްވަދެ ދިން ހަމަލާއެއްގައި އެގޭގައި ދިރިއުޅެމުންދިޔަ ދެމަފިރިންނާއި ދެކުދިން ޝަހީދު ކޮށްލައިފިއެވެ.

ޠާލިބާން މުޖާހިދުންނާ ދެކޮޅަށް ދެމުންދާ ހަމަލާތަކުގައި އެމެރިކާ ސިފައިން އެގެއަށް ވަދެފައިވަނީ އެގޭގައި މުޖާހިދުން ފިލާތިބިކަމަށް ބުނެފައެވެ.

މިހާދިސާ އާއި ގުޅިގެން އަފްޣާނިސްތާނުގެ އެކި ހިސާބުތަކުގައި އެމެރިކާ ސިފައިންނާ ދެކޮޅަށް އަޑު އުފުލަމުންދެއެވެ. އަދި އެއްވެސް ކުށެއްނެތް ބަޔަކަށް އެމެރިކާ ސިފައިން ހަމަލާ ދެމުންދާތީ, އެމީހުން އެޤައުމުން ބޭރުކުރުމަށް ސަރުކާރަށް ގޮވާލާފައިވެއެވެ.

އެމެރިކާގެ ކޮމާންޑަރުންވަނީ މިހާދިސާ އާއި ގުޅިގެން އެއީ އޮޅުމަކުން ވެފައިވާ ކަމެއްކަމަށް ބުނެފައެވެ. އެހެންނަމަވެސް, މިހާދިސާއަށްފަހު އެމީހުން މަޢާފަށް އެދިފައެއްނުވެއެވެ.

އަފްޣާނިސްތާނުގައި ނޭޓޯ ސިފައިންނާ ދެކޮޅަށް ހަނގުރާމަވެރިން ހަމަލާތައް ވަރުގަދަ ކުރުމާ ގުޅިގެން އެމެރިކާ ސިފައިންވަނީ އަސްކަރީ އޮޕަރޭޝަން ވަރުގަދަ ކޮށްފައިވެއެވެ. އަނެއްކޮޅުން ހަމަލާތަކުގައި މަރުވަމުންދާ މުޖާހިދުންގެ ޢަދަދު އިތުރުވުމާއެކު އެމެރިކާ ސިފައިންނާއި ނޭޓޯގެ ގުޅިފައިވާ ފައުޖުގެ ސިފައިންގެ ޢަދަދުވެސް އަންނަނީ އެއްދުވަހުން އަނެއްދުވަހަށް އިތުރުވަމުންނެވެ.

މިކަމާ ގުޅިގެން ނޭޓޯ ފައުޖަށް ސިފައިން ފޮނުވުމަށް މެމްބަރު ޤައުމުތަކުން އަންނަނީ ޖެހިލުންވެ ދެކޮޅު ހަދަމުންނެވެ.