މިހާރު ބާއްވަމުން އަންނަނީ ޤައުމީ ފިލްމު އެވޯޑްސް ކަމަށް ޤަބޫލު ނުކުރާ ކަމަށާއި މިގޮތަށް މިކަން ކުރިއަށް ގެންދާނަމަ އޭނާގެ އެއްވެސް އުފެއްދުމެއް އެވޯޑްގައި ބައިވެރިނުކުރާނެ ކަމަށް އެވޯޑްގައި އެންމެ ބޮޑު ކާމިޔާބު ހޯދި ޕްރޮޑިއުސަރ މުޙައްމަދު ނިޔާޒު(ޓެޑްރީ) ބުނެފި އެވެ.

ފިލްމު އެވޯޑާ ބެހޭ ގޮތުން ޖަޒީރާއަށް ދިން ހާއްސަ އިންޓަވިއުއެއްގައި ޓެޑްރީ ބުނީ ފިލުމު އެވޯޑްގެ ނަމުގައި މިހާރު ފެންނަމުންދަނީ ނާޗަރަންގީއެއް ކަމަށެވެ. ”އަހަރެންނަކަށް ނުވިސްނޭ އެއަށް ޤައުމީ ފިލުމު އެވޯޑޭ ކިޔޭނެ ގޮތެއް. އޭގެ ތެރޭގައި ކުރު ފިލުމުތައް ހިމަނައިގެންވެސް ބޭއްވިގެން ނުވާނެ. މިހާރުގެ ފިލުމު އެވޯޑްގެ އަސްލަކީ ފަޓާސް ފައްޗެއްގައި ރޯކޮށްލީމަ ރޯވަމުންދާ އުސޫލުން ދާނެ 100 ވެސް. ހެނދުނެއް މެންދުރެއް ރޭގަނޑެއް ނޯންނާނެ. “ 5 އެވޯޑް މިހާތަނަށް ބޭއްވިއިރު ދެ އެވޯޑެއްގައި ލީޑްކޮށްފައިވާ ޓެޑްރީ ބުންޏެވެ.

ޓެޑްރީ ބުނީ ފުރަތަމަ އެވޯޑް ބޭއްވިފަހުން ބޭއްވި 4 އެވޯޑަކީވެސް އެއްވެސް ފެންވަރެއް ހުރި އެވޯޑްތަކެއް ކަމަށް ޤަބޫލު ނުކުރާ ކަމަށެވެ. ”ބަޔަކަށް އެއްޗަކަށް ނުވިއަސް އަހަރެމެން ފިލްމީ ދާއިރާގެ މީހުންނަށް މީތިވާނީ ވަރަށް ބޮޑު އެއްޗަކަށް. އަހަރެމެންގެ ދަރިންގެ ދަރިންނަށްވެސް ފެންނަން ހުންނާނެ އެއްޗަކަށް މީތި ވާންޖެހޭ. އެކަމަކު ތިންވަނަ ފިލްމު އެވޯޑްސްގައި އަހަރެންނަށް ލިބުނު އެވޯޑްތައް މިހާރު އެހުރީ ރޫޅިފައި. އޭގައި ޖަހާފައި ހުރި ލޯ ފޮތިތައް ނެއްޓިއްޖެ. ނަންކޮޅުވެސް މިހާރަކު ނެތް. އެކަމަކު ފުރަތަމަ ފިލުމު އެވޯޑްގައި ދިން ޓްރޮފީ އިއްޔެ ދިން އެއްޗެކޭ އެއްވެސް ތަފާތެއް ނެތި ހަމަ އެގޮތުގައި އެބަހުރި. މިކަމުންވެސް އެނގިގެން ދިޔައީ އެވޯޑްގެ ފެންވަރަށާއި ކޮލިޓީއަށް އައިސްފައިވާ ބަދަލު.“ މިދިޔައަހަރު ކުރީކޮޅު ބޭއްވި އެވޯޑްގައި 12 އެވޯޑް ހޯދި އަމާނާތުގެ ޕްރޮޑިއުސަރ ބުންޏެވެ.

ޓެޑްރީ ބުނީ އޭނާ ފިލުމު އެވޯޑް ޤަބޫލު ނުކުރާއިރުވެސް 3 ވަނަ ފެސްޓިވަލުގައި އަމާނާތް ބައިވެރިކުރީ ސަބަބުތަކެއް ހުރެގެން ކަމަށެވެ. ”ފިލުމު އެވޯޑެއް ނުބޭއްވި އެތައް އަހަރެއް ދިޔައީމަ އަހަރެންނަކީ އެވޯޑެއް ބާއްވަން އެންމެ ބޮޑަށް ބާރު އަޅަމުން އައި މީހާ. ނަޝީދު މިނިސްޓަރކަމާ ހަވާލުވެ ބޭއްވި ބައްދަލުވުމުގައިވެސް އަހަރެން އެންމެ ބޮޑަށް އެދުނު ކަންތައްތަކުގެ ތެރޭގައި ފެސްޓިވަލު ޤަވާއިދުން ބާއްވާ ދިނުން ހިމެނޭ. ދެން އަހަރެން އެކަމުން ދުރަށް ގޮސްފިއްޔާ ވަރަށް އެހެން ކަހަލަ ގޮތްތަކެއް ވާނެތީ އަހަރެން ބައިވެރިކުރީ. އެކަމަކު ދެން އަހަރެންގެ އެއްޗެއް ފެސްޓިވަލުގައި ބައިވެރިކުރުމުގެ އެއްވެސް ހިޔާލެއް ނެތް. ހާއްސަކޮށް މިހާރު މި ބާއްވާ ގޮތަށް ބާއްވާ ކަމަށްވެއްޖިއްޔާ.“ ފިލްމީ ދާއިރާގައި އެންމެ މޮޅެތި އުފެއްދުންތައް އުފައްދާ ކަމަށް ގިނަ ބަޔަކު ބުނަމުންދާ ޓެޑްރީ ބުންޏެވެ.

ޓެޑްރީ ބުނީ ކުރިން ފެސްޓިވަލު ބާއްވަންވެގެން ފިލުމީ ދާއިރާގެ މީހުންގެ ޚިޔާލު ހޯދަން ބޭއްވި ބައްދަލުވުމަށްވެސް އޭނާ ދިޔަ ކަމަށާއި ގިނަ ހިޔާލުތައްވެސް ހުށަހެޅި ކަމަށެވެ. ”އެކަމަކު އެމީހުންނަށް އެކަންތައް ބަލައެއް ނުގަނެވުނު. މިސާލަކަށް އަހަރެން އޭރުވެސް އަދި މިހާރުވެސް މި ބުނަނީ ފިލުމެއްގައި ވާހަކައަކަށް އެވޯޑެއް ނުދެވޭނޭ ހުރިހާވެސް އެއްޗަކީ ސްކްރީންޕުލޭއޭ. އެކަމަކު ހަމަ ކޮންމެ ފަހަރަކުވެސް ވާހަކައަށްވެސް އެބަ އެވޯޑްދެވޭ. މި ދެވެނީ އެކައްޗަކަށް ދެ އެވޯޑް“ ޓެޑްރީ ބުންޏެވެ.

ޓެޑްރީ ބުނީ އޭނާގެ ފިލުމުތައް އަދިވެސް ފެންނާނެ ކަމަށާއި އެހެން ނަމަވެސް ތަރިންނާ އެގްރިމަންޓް ހަދާއިރު ފިލުމު އެވޯޑްގައި ބައިވެރިކުރުމާއި ނުކުރުމުގެ އިހްތިޔާރު ޕްރޮޑިއުސަރަށް އޮންނަ ގޮތަށް އެގްރިމަންޓް ހަދަން ވިސްނާފައިވާ ކަމަށެވެ. ”އޭރުން އެ ކަންތައްތައް ހުންނަ ގޮތަކަށް ބަލާއިރު އެ ފެންވަރަށް އެވޯޑް ބޭއްވެންޏާ ބައިވެރިކުރާނީ. މިހާރު މި ބާއްވާ ގޮތަށް ކުރަންޏާ ބައިވެރިނުކުރާނެ“ ޓެޑް ބުންޏެވެ.

ޓެޑްރީ ބުނީ އެން ސީ އޭ މިހާރު ހިންގަން ހަވާލުވެފައިވާ ޑިރެކްޓަރ ޖެނެރަލް ޝަމްއޫން ހަމީދަކީ އެކަމަށް ގާބިލު ބޭފުޅެއް ކަމަށް އޭނާ ޤަބޫލު ނުކުރާ ކަމަށެވެ.

ޓެޑްރީ ބުނީ އަހަރެއްހާ ދުވަހުގެ ތެރޭގައި ފިލްމީ ތިން އެވޯޑް ފެނިގެން ދިޔުމަކީ އާދަޔާ ޚިލާފުވެސް ކަމެއް ކަމަށެވެ. ”މިހާ ކައިރި ކައިރީގަ ގިނަ އެވޯޑްތަކެއް މި ބޭއްވީ ސިޔާސީ ފައިދާތަކެއް ހާސިލު ކުރުމަށް. އެވޯޑްތައް ދެވެނީވެސް ފިލްމީ ދާއިރާގެ ވީހާވެސް ގިނަ ބަޔަކު ހެޕީވާނެ ގޮތަށް. އެހެންވެ މިއަހަރުގެ މެދެހެއްހާ ހިސާބަށްދާއިރު ކެމްޕޭން ދަތުރުތަކުގައި ރާއްޖެ ތެރޭގެ ސްޓޭޖްތަކުން ފިލްމީ ދާއިރާގެ މީހުން ފެނުމަކީ ހަމަވާނެ ކަމެއް. އެވޯޑް އޮތްރޭ ސްޓޭޖް މަތިންވެސް އެކަހަލަ މަންޒަރެއް ފެނުނު“ ޓެޑްރީ ބުންޏެވެ.

ޓެޑްރީ ބުނީ ފިލްމީ ދާއިރާއެކޭ ޤައުމީ ފީކުދާނެކޭ އެއްވެސް ތަފާތެއް ނެތް ކަމަށެވެ. ”އެމީހުން ބޭނުންވީމަ ރަނގަޅަށް ކަމެއް ކޮށްލާފަ އަނެއްކާ ބޭނުންވީމަ ބޭނުން ގޮތެއް ހަދާލަން އޮންނަ ބައެއް މިއީ. އެގޮތަށް އެކަން ވަމުން އެދަނީ.“ ޓެޑްރީ ބުންޏެވެ.